1 Pou Bawipaw , akaw-aleih

nae do mamia zah nae ny vae.

2 Ka haung ze thuasah,

ka thoku ze thuasah phe nae ny;

ka tuanaw kha asawnaw kyate phe na ny.

3 Ka ccianaw laanpi te ka inaw kha

akaw-aleih phe na muih zah,

ka cyisahnaw balyn kha marya na ny.

4 Bya kaw kheit san ka ho mawze,

pou Bawipaw ,

ka ho lanpaw kha khaleih na ny.

5 Ka nulang ka malang te nae voilu zah,

na kuih kha ka tungvaw na khang.

6 Tuhcihawpaw hawnaw tuh ka hanlan

myaryasankae ngaeangthua lan a um;

tuh-e tuh myarya hang zah

ka phah kho khyh.

7 Na muisaw kyate lue khylan

teilangmou ka cceih kho cih?

Na umnaw kyate

teilangmou ka ccue kho cih?

8 Vaawram lang ka kae ze,

nang tuh tuin kya na um.

Michi khua kya inaw ka raeku ze,

nang tuh tuin kya na um.

9 Awkhua khuanin thuanaw

nithua lang phe dianaw cia ka zou zah,

niccaw lang e rili athangnaw kyakhe

ka la um lanze,

10 tuin kya heize na kuih nynh

yn cciakhae cih zah

na ranglang kuih nynh

tynkaring lan yn kyng cih.

11 "Thanccingte mohnaw nynh

kae kha yn bong cih zah,

ka pepan umpaw awnaw tuh

khuazi lang a tang cih," cite ka ho lanze,

12 mohnaw kha heize

nang na hanlan tuh moh khyh;

nang na hanlan mohnaw tuh

awnaw te aloku keiccuze

khuazi tuh khuadae hawte a aw.

13 Ka lungkhu e miakaw yn raetupaw tuh

nang nynh na thua;

ka nung vue lungkhu khe nae rae,

14 Ngaeangthua lante ri lan a um lante

nae rae keiccuze kae thehoysah.

Na ryalaw balyn tuh ngaeangthua lan

a um cipaw hoyte ka ny.

15 Kae kha alangku leinaw khe nae rae zah,

laephi akhunaw kyakhe

ccynmamyh lante he nae rae tuh,

ka pyn tuh namaw kyate thuruh thua khyh.

16 Accing loh leipaw

ka pyn kha phe na muih.

Tuh-e hae ccangkheit san a um mawkhe,

ka hanlan na raepaw nin hae balyn kha

na ccauh kya zei athua vae.

17 Pou Pachia, na tuanaw tuh

ka hanlan pawcih baban mou akhincci!

Tuh-e na tuanaw balyn tuh

pawcih baban mou ako!

18 Ria lan ka citua zah, laesia laeze

alunghua; he ka thaekuh tuh,

namaw kya mamin nynh ka um.

19 Pou Pachia, ccungccaw hoylei hae paw kha

theih hae lah,

ccungccaw chia a mang hae paw tuh

ka kyate pou hae sah,

20 minmin nynh na konglang kha

ahoy lei lante ho hae zah,

hoyleinaw hanlan nang kha

rawsete mimaw te mimaw

a hangsahku hae.

21 Pou Bawipaw ,

nang ae hua hae paw kha

ka hua khyh hae tou?

Nang ae dou hae paw kha

a nungsikuh hae paw lang

ka ria khyh hae tou?

22 Minmin kha ka thinlung balyn te

ka hua hae zah,

ka rhaw hae lang ka ria hae.

23 Pou Pachia, akaw-aleih yn do mamia lah,

ka thinlung kha nytua;

yn syntawtua lah,

ka tuanaw kha nytua.

24 Ka lungkhu kya hoyleinaw

a um tou um khyh tou

cipaw yn do lah,

zungzae tynpaw laanpi kya

yn cciakhae tua.