1 The ka hoysahpaw Pachia,

daetedae lan um nan.

2 Pawccecize ccungccaw hoylei hae te

mihyn hae nynh kae kha rawsete

ahynthyapaw lae te ka than yn ho hae.

3 Huanaw bya te kae kha

yn koihlu hae zah,

akonglang um leite yn dou hae.

4 Minmin hanlan saw ka sangpya lya hae heize

ka sungsahnaw kha

seibenaw te yn liaru hae.

5 Tuhcite hoynaw kha hoyleinaw khate

yn liaru hae zah, ka sungsahnaw kha

huanaw khate yn liaru hae.

6 Khah-e paw kha rawsete

ccungccaw hoyleipaw kha khang lah,

tuh-e seibetupaw tuh

a ranglang khe thadyn sah.

7 Byapianaw he a ing te,

phe shung sah;

a sawsangnaw kha seinaw lante

riapya thua sah.

8 A hiinshe dyn sah lah, a rya kha

mingccangpaw nynh ccou sah.✝

9 A ccaaw hae tuh ngawraw lang

tang hae sah lah,

a zu tuh nomae lang tang sah.

10 A ccaaw hae tuh khiavuikuh hae sah lah,

aepaw a ngiakuh hae paw lang tang hae sah;

arohpaw mih umnaw kyate

ccaring dee thua hae sah.

11 A hoipaw balyn kha

laebah a umsahtupaw nynh kyngpah sah;

a ryalaw mee kha mikhia hae nynh

luade hae sah.

12 Lu kheit nynh sanmah a tungvaw

ngaethyaumsahnaw hoi nan sah,

a ccaaw hae ngawraw hae tungvaw

thawccinaw a hoipaw

lu kheit sanmah um nan sah.

13 A ciihan phe mih sah lah,

a min tuh she ningnaw kya

zo ccavae sah.

14 Bawipaw nynh a minpaaw hae

hoyleinaw kha liathui sah lah,

a nung seinaw kha ngaethya nan sah.

15 Tuh-e seinaw hae tuh

Bawipaw malang

um zungzae sah lah,

laephi kyate minmin liathuinawpaw

syntawnaw kha zo sah.

16 Pawccecize aning nynh thawccinaw

langsaku lanpaw kha tua vae khyh,

ryachi hae, ahobou hae paw te

thinlung a koi hae paw kha

phe a chih lan hae cia vawsaw a pya hae.

17 Aning tuh thyalawnaw a rypaw thua zah,

a tungvaw thyalawnaw ccah sah;

hythuanaw a ry leipaw thua zah,

hythuanaw tuh amaw kyate sawkuh sah.

18 Thyalawnaw kha a angkile hawte a kiku,

thyalawnaw tuh a pyn lungkhu lang

tui hawte tee sah lah,

a ru lungkhu lang chitui hawte tee sah.

19 Thyalawnaw tuh a lawkupaw

boeining hawte thua sah lah,

nin takyh a cciakupaw taeccia hawte thua sah.

20 Tuhcihawpaw tuh kae yn rawse hae paw te

ka thethya yn ho hae paw nynh

Bawipaw kyate a mue hae paw

mih cyisahnaw mee thua vae sah.

21 Pou Bawipaw ka Bawipaw,

na min liate kamaw ccelang ryalawtua;

atynpaw na sungsahnaw tuh

ahoy keiccuze kae hynh yn luesah tua.

22 Pawccecize kae tuh ka ryachi zah

a hoboupaw nynh ka thua,

ka lungkhu kya ka thinlung myarya ccih.

23 Zete ccyh e mynlyh hawte vyavya ka zo;

kae tuh tungkhipaw hawte ccaring ka peih.

24 Looh ae leite ka um keiccuze

ka ccukharu tuh a thawzya zah,

ka pyn tuh ka ngethah.

25 Kae tuh ccungccaw hae nynh

yn theihrya hae paw ka thua zah,

he yn muih vae hae ze,

mih lu yn henua hae.✝

26 Pou Bawipaw ka Pachia,

yn bawmtua!

atynpaw na sungsahnaw liate

yn khumtua.

27 Pou Bawipaw , e tuh na cyipaw,

na kuih te na raepaw nynh thua cipaw

minmin nynh nyh hae sah;

28 Minmin nynh thya a law hae zemah,

nang nynh tuh hythua na pya cih.

Kae yn rawse hae paw tuh

maethyabong thua hae sah;

na ryalahtupaw tuh a lungtua sah.

29 Sei yn be hae paw tuh

thethyanaw khate bong thua hae sah;

boeining te bongku hawte

mih maethyanaw khate

bong thua hae sah.

30 Ka khalang te Bawipaw kha

thawte ka thehoysah cih;

ccungccaw patae laku khe

amaw kha ka thehoysah cih.

31 Pawccecize ryachi hae kha chia lan

sei a be hae paw kyate khum khylan,

aning tuh ryachi hae ranglang khe

phang a thadyn.