1 Pou ka muisaw,

Bawipaw kha thehoysah tua,

ka lungkhu umpaw balyn,

a min thyaapaw kha thehoysah oh.

2 Pou ka muisaw, Bawipaw kha

thehoysah lah,

a thawccinaw balyn kha ning nan.

3 Aning tuh na seinaw balyn kha

ae ngaethyatupaw thua zah,

na ccinaw balyn kha

ae dansahtupaw nynh thua.

4 Na hiinnaw kha Hunghuapi kyate

ae shawkhawpaw thua zah,

atynpaw sungsahnaw te

thawccinaw khate nang kha

bawilukhung ae khungsahpaw nynh thua.

5 Mosipi thawzung hawte

na ngawphuenaw kha

thawsah thui athua nawlan,

na hiin lungkhu balyn hoynaw te

na lungrya ae chisahpaw nynh thua.

6 Bawipaw nynh tuaasahnaw

a ingpaw balyn hanlan

dingnaw te byapianaw kha a raepya hae.

7 A laanpi kha Moses nysah zah

a cyisahnaw kha

Israel ccungccaw hae a nysah hae.

8 Bawipaw tuh thawccih thyapaw,

ngaethyaumsah thyapaw,

lungsaepaw te atynpaw sungsahnaw te

phe abeihpaw nynh thua.✝

9 Ccungccaw tungvaw seibenaw

zungzae mang lan khyh zah,

zungzae a thinria lan khyh.

10 Ah seinaw thyhte aening kha

oun cyihru khyh zah,

ah hoyleinaw thyhte oun liaru khyh.

11 Vaawlui tuh laephi laeze ahang hawte

atynpaw a sungsahnaw tuh

amaw a rih hae paw tungvaw myarya ale;

12 nithua tuh niccaw te asawku hawte

ah cyiseimenaw kha

aening kyate oun vuapya vae.

13 Paaw nynh a ccaaw tungvaw

thawccinaw a hoi hawte,

Bawipaw nynh amaw

rawrih hae paw tungvaw

thawccinaw a hoi vae.

14 Pawccecize aening hynh

pawtemou rae ah thua oh

cipaw kha nyh zah,

aening tuh laenoi nynh

ah thua oh cipaw kha mah a nythui.

15 Ccungccaw ccyh tuh

lonua hawte nynh thua;

ccungccaw tuh loo kya-e

haetapaw hawte apaw;

16 khisan nynh tuh-e haetapaw tuh

mung zah phe azo,

a umnaw hmin kha mah

ny lan um vae khyh.

17 Thuasalama Bawipaw kya-e

atynpaw sungsahnaw tuh

amaw rawrih hae paw tungvaw kya

zungzae te zungzae cia tyn zah,

a dingnaw tuh ccaawsenopaw cia atyn,

18 a byakin a zui hae paw tungvaw te

a kawbya zui lan

a ning lei hae paw tungvaw kya atyn.

19 Bawipaw nynh a bawitungkhung tuh

vaawlang khe tynsah vae zah,

a peenaw nynh atyn-are kha a uk.

20 A hopaw bya kha kawngae hae zah

a kawpyapaw a zui hae paw,

athungpaw a vaawccungccaw hae nanning,

Bawipaw kha thehoysah oh.

21 Bawipaw rynaw

a zuipaw a ryalahtu hae,

a vaaw rhawkaw hae balyn,

Bawipaw kha thehoysah oh.

22 A uknaw hmin takyh kya um hae paw,

amaw nynh a rae hae paw balyn,

Bawipaw kha thehoysah oh.

Pou ka muisaw, Bawipaw kha

thehoysah tua.