1 Pou Pachia, thaw beih yn ccitua,

pawccecize ccungccaw hae nynh

yn syde hae;

rhaw hae nynh anin ninlang

yn tuaa yn sah hae;

2 ka rhaw hae nynh anin ninlang

yn syde hae,

ccungccaw patae nynh rawsete

yn dou hae.

Pou Ahang Huaccepaw, 3 he ka ri vae ze,

nang kha kae doliaku.

4 Pachia bya kha the ka hoysah,

Pachia kha ka doliaku keiccuze

ka rih khyh;

ccungccaw nynh pawmou

yn cyih kho cih?

5 Ka rhaw hae nynh ka cyipaw kyakhe

anin ninlang vawsaw yn pya hae;

mih tuanaw balyn tuh ka tungvaw

hoyleinaw hanlan nynh thua.

6 Pekumaekunaw kha puisah hae zah,

buhkhawte ka ccianaw kha

yn dokhaw hae.

Ka hiinnaw chia khylan

a ngaehoi lya hae khe,

7 mih hoyleinaw keiccuze

minmin kha liarutua hae;

Pou Pachia, tuh-e ccungccaw hae kha

thinriate khuliatua hae!

8 Ka ngaethyanaw kha phe na ny vae;

ka mitphi kha na tuihinbu lungkhu

phe na ruin vae.

Tuh-e hae tuh na ccauh kya

na zei vae khaw?

9 Oute nang kha he kae ko nin khe,

ka rhaw hae tuh nulang a ki cih hae.

Pachia tuh ka kalan a pan cipaw ka ny.

10 Pachia bya kha the ka hoysah,

Bawipaw bya kha the ka hoysah,

11 Pachia kha ka doliaku keiccuze

ka rih khyh.

ccungccaw bali nynh pawmou

yn cyih kho cih?

12 Pou Pachia, na kya bya ka kinkupaw kha

ka cyih hahe cih;

na kalan lungtuanaw silawnaw kha

ka rae cih.

13 Pawccecize chinaw kyate

ka hiinnaw kha nae luesah vae,

Pachia malang, hiinnaw awnaw kya

ka ccia kho nawlan,

ka ccu kha khuliakunaw kyate

nae luesah.