1 Seinaw nynh ccungccaw hoyleipaw

a thinlung kyakhe bya a hopya;

a mit kya Pachia rawrinaw

um khyh.✝

2 Pachia nynh a hoyleinaw kha

muih khyh zah hua khyh cite

tuakuh zah,

amaw te amaw kha a pooku.

3 A khalang kya-e bya tuh ahoy leipaw

te lingpaw bya nynh thua;

hawrarih lante um khyh zah,

hoynaw kha rae khyh.

4 A ikhung vawlan a i lyakhe

ahoy leipaw kha a tua;

ahoy leipaw laanpi kha zui zah,

hoyleinaw kha vua khyh.

5 Pou Bawipaw , atynpaw

na sungsahnaw tuh vaawlui

phe phah zah, na lungzinaw tuh

maeking kya phe aphah.

6 Na dingnaw tuh mua pipi te lokuh zah,

na byapianaw tuh akhupaw

rili te nynh aloku;

Pou Bawipaw , ccungccaw te

sarangpaw kha phe lokuh lante

na khum hae.

7 Pou Pachia, atynpaw na sungsahnaw tuh

pawcih baban aphute!

Ccungccaw balyn tuh

na sake mynlyh kyakhe a rekuh cih hae.

8 Na inn kya-e myarya lungpaw

looh kha ae hae zah,

na lungrythuanaw vawkhu e

tui kha nia lan na pya hae.

9 Pawccecize namaw kya

hiinnaw tuidy a um;

na awnaw kyakhe awnaw kha

kae muih.

10 Nang ae nyh hae paw kya

atynpaw na sungsahnaw tuh

zungzae tynsah tua lah,

thinlung ading hae paw kya

na khumnaw tuh zungzae tynsah tua!

11 A lysakuh hae paw ccu nynh

yn syde nan sah,

ccungccaw hoylei hae paw nynh

yn dee nan hae sah.

12 Ccungccaw hoylei hae paw tuh

tuin kya maw a khuliakuh hae;

khuliasaku athua hae keiccuze,

thokuh kho vae khyh hae.