1 Pou uktu hae, hmerarih lante

bya na pia ccaccing oh tou?

Ccungccaw hae kha

hoyte bya na pia oh tou?

2 Na pia khyh oh, nae thinlung kya

hoyleinaw kha na paccynku oh;

laephi vawlan nae kuih nynh

puathonaw rya kha a law.

3 Ccungccaw hoyleipaw tuh

a nung vue kyamawte a cceihsei vae;

a pui takaw hae te hynbya hote

a mesei hae.

4 Minmin tuh huparepaw sy te

alokuhpaw sy a hoi hae,

a nawpanpaw huparepaw hawte

mih nakaring kha a huku hae,

5 tetuh hupaw a soihthyapaw

roi kha thuasah,

a thyaruhpaw mitleihthyapaw

roi kha thuasah thae vae khyh.

6 Pou Pachia, mih khalang kya-e

mih haw kha khya hae;

Pou Bawipaw , chindeih ano hae paw

nua kha pong khya!

7 Minmin tuh aluapaw tui hawte

zo hae sah;

lonua hawte syde hae sah lah,

naan hae sah.

8 A ccia lyakhe palae tuipaw

tangkaroh hawte thua hae sah;

khuanin a muih boi leipaw

ccaaw arohpaw hawte thua hae sah.

9 Maee aruapaw hinpaw ku kya-e

asopaw kha ang nynh a ny mawkhe,

hinpaw ku ahinpaw thuasah,

aroupaw thuasah Pachia nynh

thyaararih lan phi vae hae sah!

10 Tuh-e liarunaw kha miding hae nynh

he a muih hae tuh mih lungtua cih;

ccungccaw hoylei hae paw chii te

mih ccu a singkuh cih hae.

11 Ccungccaw hae nynh,

"Miding hae hanlan lasung

a um ccaccing;

laephi vawlan bya a piatupaw

Pachia tuh a um ccaccing," cite

a ho cih hae.