1 Pou Bawipaw , siapharan tuh

na thawzung keiccu a lungtua zah,

na bawmnaw liate

pawcih baban mou a lungpaw!

2 A rypaw kha na pya vae zah,

a munglae te ae ngiakupaw kha

na kang khyh.

3 Hythuanaw patae khate na cciadue;

a lu vawlan khe bawilukhung

na khungsah.

4 Hiinnaw kha ae ngia zah na pya;

zungzae hiinshe saenaw kha na pya.

5 Na bawmnaw liate a phu-enaw tuh

myarya ale;

minthaannaw te lesaenaw kha na pya.

6 Hythuanaw kha na pya zungzae zah,

Na umkhae keiccuze lungtuanaw te

phe a beih.

7 Pawccecize siapharan tuh

Bawipaw kha doliakuh zah,

Ahang Huaccepaw kya-e atynpaw

sungsahnaw liate aning tuh

atyn zungzae cih.

8 Na kuih nynh na rhaw hae balyn kha

a kyng cih hae;

na ranglang kuih nynh

nang ae hua hae paw kha

a kyng cih hae.

9 Nang he nae langkuh te, minmin kha

ezazaepaw maeephupi hawte

na thuasah cih hae.

Bawipaw nynh a thinrianaw khate

a laang cih hae zah,

maee nynh minmin kha

phe ccung lan a u cih hae.

10 Mih ciihan hae kha laephi kyate

na maemih cih hae zah,

mih ccaaw hae kha

ccungccaw hae laku kyate

na roh cih hae.

11 Nang kha rawsete hoyleinaw kha

a paccynku hae ze thuasah,

thyaruhnaw kha a tuaku hae ze thuasah,

mih laan mih sui ua lan khyh.

12 Mih mae kha na li te na ee cih hae zah,

mih ke kha na maeleihsakuh cih hae.

13 Pou Bawipaw , na thawzung liate

nang tuh hangthung na thua sah!

Na thungnaw kha hlaw te

kae sah cih zah, kae thehoysah cih.