1 Ahang Huaccepaw kya-e

khynnaw kya na umpaw,

Athunghuapaw kya-e mynlyh kaw

na umpaw nang nynh

2 Bawipaw kyakhe, "Ka khynnaw te

ka rhawlungrua athuapaw

ka Pachia kha ka doliaku,"

cite na hopah cih.

3 Aning nynh nang kha kaangsyatupaw

kaang kyate thuasah,

chi khopaw ccinaw kyate thuasah

ae luesah cih;

4 a sake ming nynh

nang kha ae bong cih zah,

a sake kaw khe khynnaw na mue cih;

a lungzinaw tuh khawriaphua te

rhawtuk-zunghe athua cih.

5 Khuazi kya ri lan umpaw thuasah,

ninthu kya athuipaw the thuasah,

6 mohnaw kya umpaw

vawsawnaw thuasah,

ninthuccynglyn kya chia a mangpaw

ronaw thuasah na rih lan khyh.

7 Na pe khe ccungccaw thong kheit,

na ranglang khe

thong haw a chih cih hae,

thuasalama tuh-e chinawpaw nynh

nang kha ae thuanua lan khyh.

8 Na mit te do kyalya na do cih zah,

ccungccaw hoylei hae paw nynh

a teing hae paw detahnaw kha

muih te kyalya na muih cih.

9 Bawipaw kha na khynnaw lang

na nungkuh zah,

Ahang Huaccepaw kha

na umnaw hmin lang

na nungku vae keiccuze,

10 hoyleinaw tuh na tungvaw

ccah lan khyh zah,

ccinaw alepaw tuh na inn pe lang

naekuh lan khyh.

11 Na ccianaw takyh kya nang kha

rin khylan

Pachia nynh a vaawccungccaw hae kha

kaw a pya cih hae.✝

12 Na ccu kha lung kya na thuhku

khyh nawlan, mih kuih te

nang kha ae dua cih hae.✝

13 Chindeih te hupaw kha

na syde cih hae,

chindeih nopaw te huparepaw kha

na ccu te na syde cih hae.✝

14 Kae yn sungsah hae paw kha

ka luesah cih hae;

ka min yn nyh hae paw kha

ka thungkhaw cih hae.

15 Minmin nynh yn ko hae ze,

ka oi cih hae;

vawsaw a tung hae ze,

ka umkhae cih hae,

minmin kha ka luesah cih hae zah,

sawtuanaw ka pya cih hae.

16 She saenaw te minmin kha

mih lungry ka ccingsah cih hae zah,

ka khumnaw kha

ka muihsah cih hae.