1 Laephi ccungccaw hae balyn,

Pachia kalan lungtuate sia oh;

2 a min phu-esahnaw hlaw kha sah oh;

aphu-epaw thehoysahnaw kha

amaw kalan pya oh.

3 Pachia kalan khe, "Na cyipaw uccaw hae hynh

pawcih baban mou ngaeang lan a um!

Na huhan tuh myarya ale keiccuze,

na rhaw hae tuh na malang rawrite

a bakhung hae.

4 Laephi ccungccaw hae balyn nynh

nang kha ae beik hae;

namaw thehoysahnaw hlaw kha

a sah hae,

na min thehoysahnaw hlaw kha

a sah hae," cite ho oh.

5 Rang oh lah, Pachia nynh

a cyipaw hynh dotua oh:

ccungccaw hae kya a cyipaw balyn tuh

ngaeangthua lan a um.

6 Rili kha laerou lang a tangsah;

ah minpaaw hae nynh vawpi kha

mih ccu te a zua hae.

Tuin kyakhe aening tuh

amaw tungvaw ah lungtua,✝

7 a thungnaw liate zungzae a uk,

a mit nynh minphuin hae kha riri a do hae,

kaw-ei hae paw nynh mimaw te

mimaw kha hokuhthung nan hae sah.

8 Pou ccungccaw hae, ah Pachia kha

thehoysah oh,

amaw thehoysahnaw roi kha

thae hae sah,

9 amaw nynh a hiin hae paw laku kya

oun do-oih zah,

ah ccu kha theisah khyh.

10 Pou Pachia, nang nynh

kaening kha nae syntawtua;

ngun kha maee te a syntawtua hae hawte

kaening kha nae syntawtua vae.

11 Kaening kha kaang nae kaesah vae;

kae ke kya phupaw ripaw nae khang vae;

12 ccungccaw hae kha kae lu vawlan

na ccisaku vae hae;

maee te tui kyakhe kae cceih;

tuhzemah kaening kha

hoirumnaw hmin kya nae thuasah vae.

13 Maee-ute silawnaw kha ccyngte

na inn lungkhu lang ka cceih cih;

bya ka kinkupaw kha kae pya cih,

14 Vawsawnaw ka tung lyaze

ka mung nynh ho zah,

ka khalang nynh bya a kinkupaw kha

kae pya cih.

15 Athopaw tuu hae kha

mynkhuhpaw ryte

namaw kalan maee-ute

silawnaw ka rae cih;

tangnuapaw te miaa hae khate

silawnaw ka rae cih.

16 Pachia rawrih hae paw balyn,

rang oh lah, ngaetua oh,

ka hanlan yn cyipyapaw kha

kae hopah cih oh.

17 Amaw kalan thawte ka sia zah,

ka lae te amaw kha the ka hoysah.

18 Ka thinlung kya hoyleinaw kha

ka la tua ry lanze,

Bawipaw nynh yn ngaepah lan khyh.

19 Thuasalama Pachia nynh

yn ngaepya ccaccing;

ka sawsangnaw roi kha yn ngaepya vae.

20 Ka sawsangnaw kha yn vuapah khyh zah,

atynpaw a sungsahnaw kha ka kyate

a nue khyh keiccuze Pachia kha

ka thehoysah.