1 Pou Bawipaw , na kya ka rekuh;

maethyate yn nung nan;

na dingnaw te yn luesah tua.

2 Na nakaring kha ka kalan

yn tuaku tua lah,

arangte beih yn khumtua.

Nang tuh ka hanlan khynnaw

lungpi thua lah,

kae kha khum khylan sihkakinpaw

rhawlungrua thuatua.

3 Nang tuh ka lungpi te

ka rhawlungrua nynh na thua ccaccing;

pawccecize na min hanlan

yn cciakhae lah, yn muihsah tua,

4 yn syakhaw hae paw kaang kyate

yn luesah tua,

pawccecize nang tuh

ka khynnaw nynh na thua.

5 Ka muisaw hynh na kuih kya kae ap;

Pou Bawipaw , alungzipaw Pachia,

kae kha nae shawkhaw vae.✝

6 Ccungkia leipaw zohtuh

a beik hae paw kha na hua hae,

thuasalama kae tuh

Bawipaw kha kae doliaku.

7 Atynpaw na sungsahnaw liate

ka lungtua cih zah ka lungpaw cih,

pawccecize ka teingnaw kha

nae muihpah zah

ka vawsawnaw kha pe nae kipya vae,

8 ka rhaw hae kuih kalan nae ap khyh;

akonaw hmin kya nae cciasah.

9 Pou Bawipaw , ka lungvawsaw keiccuze,

thaw beih yn ccih;

Ka rawnaw ze ka mit phin zah,

ka pyn te ka muisaw mah phe roh vae.

10 Ka hiinshe tuh ngaethyanaw te dyadya lia zah,

ka kum hae tuh hawkhaekute accyh alia.

Ka seinaw keiccuze

ka thaw phe thang zah,

ka ru hae mah phe mawe hae.

11 Ka rhaw hae balyn nynh yn sarya hae,

ka innpaw hae nynh yn dothatheih hae,

kae ccawkuh hae paw nynh yn ri hae;

laanpi kya yn muih hae paw nynh

yn ccuetaw hae.

12 A nyhkuh leipaw a chihpaw hawte

yn ning vae hae;

ang koipaw hawte nynh ka thua vae.

13 Ccungccaw patae nynh aruh lante

ka thang yn ho hae paw kha ka thae,

ka pepan balyn rinaw te phe abeih,

kae kha rawsete pynkheihlan

khua a khanku hae,

kae kha chia lan cite

yn paccynnuaku hae.

14 Thuasalama, pou Bawipaw ,

nang kha kae doliaku;

"Nang tuh ka Pachia nynh na thua," ka ci.

15 Ka ccyh tuh na kuih kya nynh a um;

ka rhaw hae te yn tuaa yn sah hae paw

kuih kyate yn luesah tua.

16 Na ryalahtupaw tungvaw kya

na mitmae tuh aw sah;

atynpaw na sungsahnaw te yn khumtua.

17 Pou Bawipaw , nang kha

kae ko keiccuze,

maethyate yn nung nan,

ccungccaw hoylei hae paw tuh

maethyanaw mue hae sah;

Michi khua kya daetedae lan

um hae sah.

18 Lysaku, tansaku te miding hae kha

rawsete sawtua leinaw byaho hae zah,

ahynpaw munglae hae tuh zya dae hae sah.

19 Na raw a rih hae paw hanlan

na la ccakhungpaw hoynaw te

ccungccaw miakaw muihnaw kyakhe,

na kya a rekuh hae paw hanlan

na paccynpaw hoynaw tuh

pawcih baban mou ahoy!

20 Ccungccaw nynh aruh lante paccynnaw kyate

akhynpaw na umnaw kyakhe

minmin kha na thuruh hae;

pekunaw apuisahpaw bya kyate

na umnaw kyakhe khyndadyh lan

na nung hae.

21 Bawipaw tuh thehoysah oh,

pawccecize rhaw nynh a koihlupaw

khuapi hawte kae kha he yn koihlu hae tuh,

atynpaw a sungsahnaw kha

ngaeangthua lan um lante

yn langsapyaku vae.

22 "Na muihnaw kyate

ccaring nae dee vae," cite

thinphangte ka tuaku.

Thuasalama bawmnaw mue khylan

na kalan he ka sia tuh,

kae ngiakunaw kha nae thaepya.

23 Nanning a mithyaa hae balyn,

Bawipaw kha sungsah oh.

Bawipaw nynh mih lungzi hae paw kha

a thungkhaw hae,

thuasalama a lysakuh hae paw kha

myarya ccih lante a liaru hae.

24 Bawipaw a ngaehoikuh hae paw

nanning balyn, nae thawsae sah lah,

nae rawthung sah.