1 Bawipaw tuh ka awnaw te

kae yn khumtu nynh thua;

Hum raw mou ka rih cih?

Bawipaw tuh ka hiinnaw

a rekunaw nynh thua;

Hummou ka ripah cih?

2 Kae yn rawsepaw rhaw hae,

ccungccaw hoylei hae paw nynh

ka ngesaw kha ae lan

he yn rawse hae tuh,

thykuh hae zah a khuliakuh hae.

3 Rhawkaw phu nynh kae kha

rawsete yn sannua hae zemah,

ka thinlung tuh rih lan khyh;

kae kha rawsete rhaw a tho hae zemah,

zynkunaw ka hoi cih.

4 Bawipaw kha uccaw ccangkheit ka ngiaku,

tuh-e tuh ka ccungkuh ung cih:

tuh-e tuh ka hiin lungkhu balyn

Bawipaw inn kya um khylan,

Bawipaw puithyanaw muih khylan te

amaw rynaw ccung khylan nynh thua.

5 Pawccecize vawsaw ccyh lyakhe,

kae kha a bu kya yn resakuh cih;

a beikinn lungkhu kya yn resaku;

lungpi ahangnaw vawlan yn khang.

6 Atu ka pepan umpaw

ka rhaw hae luki langkhe

ka lu kha yn hangthung,

lungtuanaw roisawte

beikinn kya silawnaw ka rae cih;

hlaw ka sah cih zah, Bawipaw kalan

thehoysahnaw hlaw ka sah cih.

7 Pou Bawipaw , ka siapaw roi kha

yn thaepya tua,

thaw yn ccih lah, yn leihtua!

8 "Rang lah, Bawipaw mae kha

ccungtua!" cite he na ho te,

kae nynh, "Bawipaw , na mae kha

kae ccung cih," ka ci.

9 Na mae kha yn retawkuh nan.

Na ryalahtu hynh thinriate

yn maeleihtawkuh nan,

nang tuh yn bawmtu nynh na thua.

Pou yn khumtu Pachia,

yn cciataw nan lah, yn vua nan.

10 Ka nung te ka paaw nynh

phe yn vua hae zemah,

Bawipaw nynh yn hoeikuh cih.

11 Bawipaw , na laanpi kha

yn ccangpya tua;

ka rhaw hae keiccuze

alawpaw laanpi kyakhe

yn cciakhae tua.

12 Ahme leipaw ccaekia hae nynh

rawsete yn thonuakuh hae zah,

huakunaw hy kha thawte

a sue hae keiccuze

ka rhaw hae rynaw kalan yn ap nan.

13 A hiin hae paw ram kyakhe

Bawipaw hoynaw kha

ka muih cih cite ka zyn.

14 Bawipaw kha ngaehoikuh oh;

nae thawsaesakuh oh lah,

rawthungnaw thinlung hoi oh;

Bawipaw kha ngaehoikuh oh!