Pachia Hoynaw te Israel hae Nythya leinaw
1 Pou ka ccungccaw hae,
ka ccangpyanaw hynh ngaetua oh;
ka hopaw bya kalan hin
nae nakaring kha oun tuaku tua oh.
2 Tousenaw phungpaw kha ka ho cih zah,
langmawlya e byakhupaw kha ka ho cih,78.2: Mat 13.35
3 tuh-e tuh ah minpaaw hae nynh
aening oun hopya hae paw,
ah thae vae oh paw te
ah ny vae oh paw kha nynh thua.
4 Tuh-e bya hae tuh ah ccaaw hae kha
thuruhpya lei lan hae;
Bawipaw kya-e alesaepaw
ryalaw hae,
a thawzung te a la cyipaw
ngaeangnaw hae kha
yn thua cih paw she e
ccungccaw hae kya hopya lan hae.
5 Jakob ciihan kya
phunglang kha tynsah zah,
Israel hae kya upadi kha a nung,
tuh-e tuh mih ccaaw hae kya
ccangpya khylan ah minpaaw hae kha
kaw a la pya hae paw nynh thua.
6 Tuhcite a pui loh lei hae paw
malang she e mih ccaaw hae nynh
a nyhbua cih hae, minmin tuh
oun lethung cih hae zah,
mih ccaaw hae kha
a hopah pathy cih hae,
7 tuhteze nynh Pachia kha
a ngaehoikuh cih hae zah,
Pachia ryalaw kha ning leite
a kawbya kha a zui cih hae.
8 Minmin tuh mih minpaaw hae te
lokuh lan khyh hae,
mih minpaaw hae tuh
alungkhungpaw te
rawse a mang hae paw phin,
thinlung atyn lei hae paw phin,
Pachia tungvaw lungzinaw
a hoi lei hae paw nynh thua hae.