Salmos 19

Dada Duuchcha Mageniinka Ulfinna Leellishshaan

1 Iimuwwa Mageniinka ulfinna leellishshaan;

dhisendeexxi iimanna isixxe angaxxa huje haassottaan.

2 Mitte barra mittete’n tenneddee haassottaan;

mitte hashshanna wele hashsha’n tennende lebbaan.

3 Kunnichchuwwi haaso’ee hiyyachchi hedheba’a;

hafuurikinna laqisaba’a;

4 Yaane kinni erga konnechchuwwixxi butta duuchcha’n dhaqqabbaan;

buttatixxe gabala qico’ninna hiyyichchuwwi konneechchuwwik geyaan;

Mageni arishsho galdaba iima giise’een.✝19:4 Rom. 10:18.

5 Wajubbichcho dukko giddii’n fulammakishsha arishsho wa’aa hite fuldaan;

gongammaki hokkoketee’e gammadammashsha gammaddaan.

6 Ise mitte darrexxe iimatixxe gabalanaa’n fuldeexxi wele darrexxe gabalaba’aa me’itaan;

isike eebbinjixxe hunnanaa’n dande’eexxi sho’omaachchi hedhebaan.

Duuchchi Woddike Goottika Seera

7 Duuchchi Woddike Goottiki seeri dedha afeekebaan;

lubbo manjiinxe’e hedhote uuwwaan;

Duuchchi Woddike Gottik ajaji addatemeeken;

ege’na afebaake manni’a beekuma uuwwaan.

8 Duuchchi Woddike Goottiki seeri dhugaaten;

qalbetee gammashshote uuwwaan;

Duuchchi Woddike Goottiki ajaji wa’aa hiyyeeken;

ille affashsha assaan.