Salmos 39

Hawnaw hanlan Sawsangnaw

David Hlaw

1 "Ka munglae te ka sei khyh nawlan

ka cyisahnaw kha ka raeringkuh cih;

ka umnaw kya ccungccaw hoyleipaw

a um lungkhu tuh

byaho leite ka khalang

ka myh cih," ka ci.

2 Yccae leite zya ka dae;

ahoypaw kong heize ka ho khyh;

ka lungriathaenaw tuh houhouh alethung,

3 ka lungkhu kya ka lungvawsaw.

Ka tua cciamang lyakhe

ka lungvawsawnaw tuh

maee lang arua;

tetuh ka munglae te,

4 "Bawipaw , ka hiin ccyh athangnaw te

ka hiinnaw ccyh kha beih yn nysah tua;

ka hiinnaw hynh hohcihmou

adyn cipaw beih yn nysah," cite ka ho.

5 Ka hiinnaw hynh zapae kyalya

asae lante nae rae zah,

ka hiinshe hynh na muihnaw kya

accakaepaw hawte nynh thua.

Thanccingte, ccungccaw miakaw hynh

vaekheit hysuepaw

khivae hawte nynh thua.

6 Thanccingte, ccungccaw miakaw hynh

mynlyh hawte nynh

a ccia bungthung hae.

Thanccingte, accakaepaw elang

rya a suhsaku hae; sisua kha

ccakhung hae zah, hum nynh

a ccou cih cipaw nyh khyh hae.

7 Tuhte athua keiccuze, pou Bawipaw ,

kae nynh pawmou ka ngaehoi?

Ka ngaehoinaw tuh

namaw kya rou nynh a um.

8 Ka cyiseimenaw balyn kyate yn luesah.

Mingaee hae nynh

a theihrya hae paw lang

yn tangsah nan.

9 Hynh-e a cyihtupaw hynh

namaw na thua keiccuze,

yccae leite zya ka um;

bya kaw kheit san ka ho khyh.

10 Yn zia yn bua nan; na kuihlung te

nae thung keiccuze ka thawthang vae.

11 Ccungccaw kha a seinaw keiccuze

detahnaw te na thuihei,

minmin nynh a ry hae paw kha

laehaw hawte na ropya hae;

thanccingte, ccungccaw miakaw tuh

vaekheit hysuepaw

khivae sasaw nynh thua hae.

12 Pou Bawipaw , ka sawsangnaw

yn thaepah lah,

ka siaruanaw yn ngaepya tua;

ka mitphi lua lya daebabi lan

yn umtaw nan.

Ka minpaaw hae balyn hawte,

kae tuh a cceih bungthungpaw

na mikhia nynh ka thua.

13 Ka chih zah ka zo maw hin,

lungtuanaw bua ka mue nawlan,

na mae kha ccanglang yn hawitaw tua.