1 Duuchchi Woddika Gootta galateeffatte;

isika summanna ye’we;

asseexxa duchchanna gosa gosake arda’ni oodeesse.

2 Duuchchi Woddika Gootta galatik faarse;

asseexxa mambe’a yaane duuchchanna haasso’we.

3 Woyyichcha Mageno’n gammadde;

Duuchchi Woddika Gootta magenoofataak duuchchi gammadowwaal.

4 Duuchchi Woddika Goottanna isixxa hunna addatte;

duuchchi woddanna isoo Magenooffatte.

5 Asseemmaxxa mambeiinxa hujuwwa

isixxa massuwwanna mureexxa murtuwwa kassi hiyye;

6 Ha’no erganjo Abirihaamixxe hortee,

isi ifike umi’a fi’leexxe Ya’iqoobixxe oosee qaabbatte.

7 Duuchchi Woddik Gootti no’oke Magenon;

isi butta duuchcha’n moyeedheen.

8 Aageexxa kako yookaan asso’a addachchiiseemmaka haaso’a kuma ilensha qico’ninna kaddo’o

duuchchi woddi’anna dedhabaan.

9 Abirihaami’a aageemmaxxa kakonna

Yisaaqi’a asso’a addachchiiseemmaka haaso’a muuxaan,✝105:9 Dada. 12:7; 17:8; 28:3.

10 Kunni Ya’iqqoobike seera kadaashsha

Isira’eeli’anna duuchchi woddi’a turtaaxxe kako kaddaashsha duudhe.

11 Tinni aageexxi kakoo «Kenaanika booga ati’a uwwannon;

isinna atike qadaada kadaan» hitaaxxemman.✝105:11 Dada. 28:13.

12 Tinni kaddaa wodda Mageniink ardi laakkossik heenokemman;

bogakeenna keesummatemman.

13 Insa’nenna mitte ardike bogibaa’ni weliinkibaa’a

mitte bogixxe mootummabaa’ni weliinxibaa’a doonsakiyya hine.

14 Yanne kinni Mageni ayyinna insa’nee miidho’a waalebaan;

insa’neexxee hiyyeexxi moyanjuwwakanna xixxe.

15 «Fi’lenneka anka erganjuwwa kissinoqqe’e;

anxa wabeekonna miittinoqqe’e» hiyya’n insa’nee xexe’achchiise.✝105:15 Dada. 20:3-7.

16 Duuchchi Woddik Gootti boga insa’neke’n solo’o ibise;

indaachcho duuchchanna balleesse.✝105:16 Dada. 41:53-57.

17 Yaane kinni insa’ne giddii’n mitte manjo ediseexxi erge;

iikki manjinna garbiinsha gurguremeemmake Yooseefitemman.✝105:17 Dada. 37:28; 45:5.

18 Isixxi lekka lekkatike siblinni usurendeemman;

isike gooba’ninna sibljiinxe sageetto hexxemman.

19 Yoosef umo ifinge’ninni ediseexxi haaso’emmaxxi yanne

muuxxendaa qici’anna

Duuchchi Woddike Goottike hiyyichchixxi dhugaalessumma isi’a kokeesendaa qici’atemman.✝105:19 Dada. 39:20—40:23.

20 Ookkoneechchni udduma Gibtsek moyanji

Yoosefii’i tikiseexxi fulche.✝105:20 Dada. 41:14.

21 Isike minike umo asseexxi hariire;

isixxe karra duuchchike galchallonna asse.✝105:21 Dada. 41:39-41.

22 Moyanjiinka jalqabuwwa ajajo’aanna

moyanjiinka mari’etika manna beekkuma barachchsiiso’a baalloome.

23 Ookkoneechchi uduma Ya’iqoobi Gibtsee’a me’eexxi

ookko keesummumma ofo’le.✝105:23 Dada. 46:6; 47:11.

24 Duuchchi Woddik Gootti arda ifika hara bira sa’isse;

naapha insa’neek caalanna jabaanta’n me’inaashsha asse.

25 Duuchchi Woddk Gootti kinni ardi ifik jibbemaashshanna

isike erganjuwwa’n shokkoti ke’aashsha Gibtseke mannika yaada jijjiire.✝105:25 Fula. 1:7-14.

26 Ookkoneechchi uduma Mageni ifika erganjo Muusennaa,

fi’lemmaka Aaroonii’i Gibtse’a erge.✝105:26 Fula. 3:1-4.

27 Insa’nenna oddo insa’nexxe’n mambe’iinka beessiissuwwa

masso yaanuwwanna Gibtsike boga’n assine.

28 Boga ookkonee Mageni dukkanaashsha asse;

kaddo malee’e Gibtsek manni Magenokee ajajemeba’a.✝105:28 Fula. 10:21-23.

29 Insa’neke galaanuwwika wode’e jijjiireexxi mundete asse;

qulxu’me duuchchanna shiyye.✝105:29 Fula. 7:17-21.

30 Boga insa’neke duuchcha’n raachchi wo’me;

moyanjiink moyeti mini giddi midde gatebaanigi duuchchiinba raachchi wo’me.✝105:30 Fula. 8:1-6.

31 Faachchikinna bookuwwa duuchchiiba’aa insa’neke bogi giddo

girrise’e me’aashsha ajaje.✝105:31 Fula. 8:16-17, 20-24.

32 Mageni insa’neke boga’n xeeniinxa bakka

kaadetanna banqo ibise.

33 Insa’neeka woyinetika hiddichchuwwanna belleesse;

wele haqichchuwwa duuchchanna butuchche.✝105:33 Fula. 9:22-25.

34 Isi ajajemmashshanni laakko’a dandeessissabaak

koro’miisinna awwaanessi dage.

35 Boga insa’neeke’n hedheechcho hanjachcho duuchchanna

midha duuchcha ite biraashsha asse.✝105:35 Fula. 10:12-15.

36 Mitte mittiniinge Gibtseke mini hadika angafa belto shiye.✝105:36 Fula. 12:29.

37 Ookkoneechchi uduma Isira’eelika arda aadhe fulche;

fullee wodda birreti siblikanna worqetika seesuwwa adhinetemman;

insa’neke gosat minuwwike manni gidii’n mittikinna uduma gateek hedhemmabaan.

38 Gibtseek manni lumoshsha insa’nee sodatemaxxee

Isira’eelike mannixxe me’a’n gammade.✝105:38 Fula. 12:33-36.

39 Me’inaa wodda Mageni duumanchik insa’nee golle;

hashshanna giira insa’ne’a ifise.✝105:39 Fula. 13:21-22.

40 Indaachcho qorree wodda gogorre labbaaxxa ci’a insa’ne’a iyyedage;

iimii’ni indaachcho uwweexxi insa’nee goddise.✝105:40 Fula. 16:2-15.

41 Rassa shateen; wodi’ikinna fule;

qiilla gammoojje giddonna glaaniinsha yaa’e.✝105:41 Fula. 17:1-7; Lak. 20:2-13.

42 Abirihaamii’i ifike ernganji’a uwwemmaxxa

ifixxa woyyitte addachchiisa dedhebaan.

43 Tennexxee fi’lemeeka ifika arda aadheexxi fulche;

insa’nenna gammashshoti faarsina’ni illillinise.

44 Wele ardika boga insa’ne’a uwwe;

weli elo’eexxi huccemmaka fichchuuwwanna insa’nee dhaalchise.✝105:44 Iya. 11:16-23.

45 Mageni tennee duuchcha asseechchi ardi isik seera isika duuchcha heqedho’anna

ajaja isika duchchanna muuxo’aten.