1 * BWANA, umeiridhia nchi yako,

Umewarejesha mateka wa Yakobo.

2 Umeusamehe uovu wa watu wako,

Umezisitiri hatia zao zote.

3 Umeiondoa ghadhabu yako yote,

Umerudi na kuuacha ukali wa hasira yako.

4 Mungu wa wokovu wetu, uturudishe,

Uikomeshe hasira uliyo nayo juu yetu.

5 Je! Utatufanyia hasira hata milele?

Utadumisha ghadhabu kizazi hadi kizazi?

6 * Je! Hutaki kurudi na kutuhuisha,

Ili watu wako wakufurahie?

7 Ee BWANA, utuoneshe rehema zako,

Utupe wokovu wako.

8 * Na nisikie atakavyosema Mungu BWANA,

Maana atawaambia watu wake amani,

Naam, na watauwa wake pia,

Bali wasiurudie upumbavu tena.

9 Hakika wokovu wake uko karibu na wamchao,

Ndipo utukufu wake ukae katika nchi yetu.

10 * Fadhili na kweli zitakutana,

Haki na amani zitakumbatiana.

11 * Kweli itachipuka katika nchi,

Haki itachungulia kutoka mbinguni.

12 * Naam, BWANA atatoa kilicho chema,

Na nchi yetu itatoa mazao yake.

13 Haki itakwenda mbele zake,

Na kuzitayarishia hatua zake mapito.