1 * BWANA ametamalaki, mataifa wanatetemeka;

Ameketi juu ya makerubi, nchi inatikisika.

2 BWANA ni mkuu katika Sayuni,

Naye ametukuka juu ya mataifa yote.

3 * Na walisifu jina lake kuu litishalo;

Ndiye mtakatifu.

4 * Mfalme mkuu* upendaye hukumu kwa haki;

Umeiimarisha haki;

Umefanya hukumu na haki katika Israeli.

5 * Mtukuzeni BWANA, Mungu wetu;

Sujuduni penye kiti cha miguu yake;

Ndiye mtakatifu.

6 Musa na Haruni walikuwa makuhani wake,

Na Samweli pia ni miongoni mwa walioliitia jina lake,

Walimlilia BWANA naye akawaitikia;

7 * Akasema nao katika nguzo ya wingu.

Wakashika shuhuda zake na amri aliyowapa.

8 * Ee BWANA, Mungu wetu, ndiwe uliyewajibu;

Ulikuwa kwao Mungu mwenye kusamehe

Ingawa uliwapatiliza matendo yao.

9 Mtukuzeni BWANA, Mungu wetu;

Sujuduni mkiukabili mlima wake mtakatifu;

Maana BWANA, Mungu wetu, ni mtakatifu.