Kitaaba Faaru'uu 141

Daadimata Cubbuu Akka Hin Hunyeef Dhikaate

Faaruu Daawitii

1 Ee Mootii Waan Maraa,

ani si Waammadha;

ati ariifadhuu na bira koy!

Yennaa ani si waammadhu,

qoonqoo tiyya dhage’i.

2 Daadimati kiyya

si duratti akka hixaana aarfamuu,

harka ol kaasuun kiyya

akka ciincaa galgalaa te’uu ti.

3 Ee Mootii Waan Maraa,

afaan kiyyaaf eedduu,

hidhii tiyyaaf tissee tolchi.

4 Hantuu hujiisaaf akka hin halchine,

worra hantuu huju woliin

qooda akka hin fudhanne na eegi;

worra hantuu huju woliin

sagalee isaanii dansaa

akka nyaadhu na hin lakkisin.

5 Nami balchaan na dhaaniis naaf dansa’a;

na xixiis isaalle akka dhadhaa mata’aa ti;

mataan kiyya dhadhaa hin jibbu.

Hujii worra hama’aa didiisaaf ammoo,

ani yennaa mara daadimadha.

6 Bulchitooti isaanii

yennaa bowwaa rassa’aatitti

gad qolaanfamane,

wonni ani dubbadhe

dhugaa akka teete hin beekan.

7 Isaan, «Akkuma nami lafa qotee butuchu,

lafeen teennalle

addee worri du’e jirutti bittinnootte»

hin jedhan.

8 Ee Mootii Waan Maraa,

Goottaa kiyya,

ilti tiyya gara keeti ilaalti;

ani gara keeti baqadha;

akka ani du’u na hin lakkisin.

9 Fonxoroo isaan naaf afane irraa,

tiyyoo worra hantuu hujuu irraa na eegi.

10 Ani nageyaan dabaree,

worri hamaan

tiyyoo ifumaaf afeen qabamuu ti.