1 ओ यहोवा, मां तेरिया दया रा ओर न्याय रा गीत बनाणा,

ओर आँऊ ये तेरिया तँईं गाऊँआं,

2 मां अक्ला साथे खरिया बाटा रे चलणा।

प्रभु, तूँ मांगे कदी आऊणा? मां आपणे कअरे खरा चाल-चलण राखणा।

3 मां केसी बी बुरे कामा पाँदे मन नि लगाणा।

आऊँ बुरिया बाटा रे चलणे वाल़ेया रे कामा ते कृणा करूँआ;

एड़े कामा रे मां नि लगणा।

4 बुरा सबाओ मांते दूर रणा;

मां बुराईया ते बी दूर रणा।

5 जो माणूं पीछा ते आपणे पड़ोसिये री निंदा करोआ,

तेसरा मां सत्यानाश करना; जेसरिया आखी रे कमण्ड साफ-साफ दिशोआ

ओर जेसरा मन कमण्डी ए, से मां सईन नि करना।

6 मेरिया आखी देशो रे परोसे जोगे लोका पाँदे लगी रिया रणियां ताकि सेयो मां साथे रओ;

जो माणूं खरिया बाटा रे चलोआ सेई मेरी सेवा करने वाल़ा ऊणा।

7 जो माणूं दूजेया खे तोखा देओए सेयो मेरे मईलो रे पीतरे नि रई सकदे;

जो चूठ बोलोआ से मां सामणे टीकी नि सकणा।

8 मां आपणे देशो रे दुष्ट लोक हर रोज नाश करने;

मां सब बुरे लोक यहोवे रे शईरो* ते बारे निकाल़ी देणे।