Salmos 132

प्रभुए रे मन्दरो रिया तँईं प्रार्थना

यात्रा रा गाणा

1 ओ यहोवा, राजा दाऊद ओर तेसरे जरिये सये दे सबी दु:खा खे नि पुलणा।

2 तिने तांते एक गम्भीर वादा कित्तेया,

तेस पराक्रमी परमेशरो री, जेसरी म्हारे बुजुर्ग याकूबे उपासना कित्ती थी।

3 तिने बोलेया, "मां तेस बखतो तक आपणे कअरे नि जाणा

ओर ना आपणे बिस्तरे पाँदे लेटणा;

4 मां आपणियां आखी रे नींज नि आऊणे देणी

ओर ना आपणियां पलका खे चपकी लणे देणी,

5 जदुओ तक आऊँ यहोवे रिया तँईं एक जगा नि बणाऊँ,

जो तेस पराक्रमी परमेशरो रा कअर ए, जेसरी उपासना याकूब करो था।"*132:5 प्रेरित 7:46

6 देखो, एप्राता दे आसे वादे रे सन्दूको रे बारे दे सुणेया,

ओर से यरीमो रे डोरूआ रे पाया।*132:6 1 शमूएल 4:1-6:16

7 आसे बोलेया, आसे यहोवे रे मन्दरो खे चलूँए;

आओ आसे तेसरे सिंहासनो रे सामणे माथा तेकूँए!

8 ओ यहोवा, मन्दरो दे आओ वादे रे सन्दूको गे,

जो आपणियां शक्तिया रा नशाण ए, ओर एती सदा खे रओ।

9 तेरे पुरोईत सदा सेई करो जो सई ए;

ओर तेरे पग्त लोक जयजयकार करो।

10 तैं आपणे दास दाऊदो ते वादा करी राखेया ए;

ओ यहोवा, आपणे चूणे दे राजे खे अणदेखा नि कर।

11 यहोवे दाऊदो ते सच्ची कसम खाई राखी ओर तेस तिजी ते नि मुकरना:

"मां तेरे निज पाऊआ बीचा ते एक पाऊ तेरी गद्दिया पाँदे बठयाल़ना।*132:11 2 शमूएल 7:12, प्रेरित 2:30

12 जे तेरे वंशो रे लोक मेरी वाचा खे मानेया करोगे

ओर जो आज्ञा मां तिना खे सिखाणी, तिजी पाँदे चलो,

तो तिना रे वंशो रे लोक बी तेरी गद्दिया पाँदे जुगो-जुगो तक बैठदे जाणे।"

13 कऊँकि प्रभुए सिय्योन चूणी राखेया

ओर तिजी खे आपणे रणे री जगा बनाणे री इच्छा करी राखी।

14 तुसे बोलेया, "ये से जगा ए जेती मां सदा खे रणा,

ये मेरा कअर ए।"

15 मां सिय्योन शईरो री हर एक चीजा पाँदे आशीष देणी,

एते शईरो रे गरीबा खे मां खाणे पीणे खे बऊत देणा।

16 मां एथो रे पुरोईता खे उद्धारो रे टाल्ले पनयाणे,

एते शईरो दे रणे वाल़ेया पग्त लोका खुशिया साथे जयजयकार करनी।

17 एती मां दाऊदो रे वंशो बीचा ते एक महान राजा बनाणा;

एती मां आपणे चूणे रे राजे रा राज सुरक्षित करना।*132:17 लूक 1:69

18 मां दाऊदो रे दुश्मण शर्मिंदा करने;

पर दाऊदो रा मुकुट तेसरे सिरो पाँदे सदा सजेया रा रणा।