1 प्रभुए री स्तुति करो।*146:1 हल्लेलुयाह

ओ मेरे मन प्रभुए री स्तुति कर!

2 मां पूरी जिन्दगी प्रभुए री स्तुति करदे रणा;

जदुए तक आऊँ जिऊँदा रणा,

तदुए तक मां आपणे परमेशरो रा पजन गांदे रणा।

3 तुसे ना तो केसी परदानो पाँदे परोसा राखणा, ना केसी माणूंए पाँदे,

कऊँकि तिना दे बचाणे री सामर्थ नि ए।

4 तिना रा बी प्राण निकल़ना, सेयो बी माट्टिया रे मिली जाणे;

तेसी दिने तिना रिया सारिया योजना नाश ऊई जाणिया।

5 से बऊत ई तन्य ए, जेसरा मतदगार याकूबो रा परमेशर ए

ओर जेसरा परोसा आपणे प्रभु परमेशरो पाँदे ए।

6 सेई परमेशर सर्ग ओर तरती, समुद्र ओर तिदे जो कुछ अए, सबी खे बनाणे वाल़ा ए

ओर प्रभु आपणा वचन सदा खे पूरा करोआ।*146:6 प्रेरित 4:24, प्रेरित 14:15, प्रेरित 17:24, प्रकाशित 10:6, प्रकाशित 14:7

7 से कमजोर माणूंआ खे न्याय दलाओआ

ओर पूखेया खे रोटी देओआ।

प्रभु बंदिया खे छुड़ाओआ;

8 यहोवा अन्देया खे आखी देओआ।

से तिना खे ऊबे चकोआ जो रूड़ी गे रे,

यहोवा तर्मिया साथे प्यार राखोआ।

9 प्रभु परदेशिया री रक्षा करोआ

ओर अनाथ ओर बिदुआ खे सम्बाल़ोआ;

पर से दुष्टा री बाटा खे बांगा-टेडा करोआ।

10 ओ सिय्योन, तेरा प्रभु परमेशर पीढ़िया ते पीढ़िया तक सदा राज्य करदा रणा।

प्रभुए री स्तुति करो।*146:10 हल्लेलुयाह!