1 तूँ मेरा परमेशर ए! आऊँ तेरी आराधना करूँआ।

मेरा दिल तेरिया तँईं एड़ा तरसोआ, जेड़ा रेगिस्तानो दे ठण्डे पाणिये खे तरसोए।

2 ईंयाँ मैं पवित्र जगा रे तां पाँदे नजर कित्ती,

ताकि आँऊ तेरी महिमा ओर सामर्थ देखूँ।

3 कऊँकि तेरी अटल प्यार जिन्दगिया ते बी खरी ए,

मां आपणे मुंए ते तेरी तारीफ करनी।

4 जदुए तक आँऊ जिऊँदा ए तदुए तक मां ताखे तन्य बोलदे रणा;

मां तेरिया तरफा खे आपणे आथ फैलाणे ओर तेरे नाओं ते प्रार्थना करनी।

5 तूँ माखे बऊत खुश करेआ, बडिया खाणे ते खरा। मां तेरी स्तुति करने रिया तँईं खुशिया ते गीत गाणा।

ओर मां जयजयकार करी की तेरी स्तुति करनी।

6 जेबे आऊँ बिस्तरे पाँदे लेटेया दा ऊँआ, आऊँ ताखे याद करूँआ,

ओर सारी रात तेरे ई बारे दे सोचेया करूँआ।

7 कऊँकि तूँ मेरा मतदगार बणी रा,

इजी री खातर मां तेरे पंखा री छाया रे तेरी जयजयकार करनी।

8 मेरा प्राण तां साथे जुड़ी रा

ओर तेरा दाँणा आथ माखे सम्बाल़ोआ।

9 पर जो लोक माखे काणे री कोशिश करोए,

सेयो मरे दे लोका रिया दुनिया दे चली जाणे।

10 सेयो तलवारी साथे काये जाणे

ओर गीदड़ा खे खाणे रिया तँईं ऊई जाणे।

11 पर राजा परमेशरो रिया बजा ते खुश ऊणा;

सब कोई परमेशरो री कसम खाओए

ओर तिदे ई आपणी तारीफ करने लगोए;

पर चूठ बोलणे वाल़े लोका रा मूँ बंद कित्तेया जाणा।