Salmos 68

इस्राएली लोका रा स्तुतिगान

बजाणे वाल़े परदानो रिया तँईं दाऊदो रा पजन, गीत

1 परमेशर उठी की खड़ा ओआ, ओर आपणे दुश्मणा खे बखेरी देओआ

ओर जो तेसते दुश्मणी राखोए से तेसरे सामणे ते आरी की नठी जाणे।

2 जिंयाँ तुआँ उडी जाओआ, तिंयाँ ई तूँ तिना खे डवाई दे;

जिंयाँ मोम आगी सामणे गल़ी जाओआ,

तिंयाँ ई दुष्ट लोक परमेशरो रिया मौजुदगिया ते नाश ऊई जाणे।

3 पर तार्मिक माणूं खुश ऊणे, सेयो परमेशरो सामणे बऊत खुश ऊणे;

सेयो आनंदो साथे बऊत मगन ऊणे!

4 परमेशरो रिया तँईं गीत गाओ, तेसरे नाओं री स्तुति करो,

जो बादल़ा पाँदे सवार ऊई की चलोआ, तेसरिया तँईं सड़क बणाओ;

तेसरा नाओं यहोवा ए, इजी खे तुसे तेस सामणे खुश ओ!

5 परमेशर आपणी पवित्र मन्दरो*68:5 स्वर्गो दे दे रओआ,

से अनाथ बच्चेया रा बाओ ओर बिदुआ रा रखवाल़ा ए।

6 परमेशर अनाथा रा कअर बसाओआ

ओर बंदुआ खे छुड़ाई की भाग्यशाली बणाओआ;

पर तेसते बिद्रोह करने वाल़ेया खे ऊजड़ जमीना रे रणा पड़ोआ।

7 ओ परमेशर, जेबे तूँ आपणी प्रजा ते आगे-आगे चलो था,

जेबे तूँ सुनसाण जगा रे सेना समेत चलेया, सेला

8 तरतिया पाँदे भूकंप आया ओर बरखा ऊई,

कऊँकि तूँ इस्राएलिया रा परमेशर यहोवा जो सीनै रे पाह्ड़ो पाँदे राज करोआ, तेरे डरो रे मारे तिना खे थुरनी छुटीगी।

परमेशर, आ, इस्राएलो रे परमेशरो री मौजुदगिया रे थरथराणे लगेया।*68:8 इब्रानी 12:26, न्यायियो 5:4,5

9 ओ परमेशर, तैं सर्गो ते बऊत जादा बरखा कित्ती,

जेतेते तैं आपणी जगा फेर अरी-परी करी ती।

10 तेरे लोका रे चूण्ड तेते देशो रे बसणे लगे;

ओ परमेशर, तैं आपणी पलाईया ते गरीब लोका खे खरिया चीजा दित्तिया

जिना री तिना खे जरूरत थी। तैं सेयो मजबूत बणाए।

11 प्रभु आज्ञा देओआ, तेबे शुभ समाचार सुनाणे वाल़िया जवाणसा रा

बड़ा चूण्ड ऊई जाओआ।

12 आपणी-आपणी सेना समेत दुश्मण राजे दौड़ी की चली जाओए

ओर कअरे रणे वाल़िया जवाणसा तेसा लूटा रे समानो खे बांडी लओईया।

13 तिना खे चाँदिए साथे मढ़े रे कबूतरा रे पंख

ओर सूईने साथे मढ़े रे पैर मिले।

ओ मर्दो, क्या तुसे पेडा रिया गवाईणी रे दुबकी की बैठी रणे?

14 जेबे सर्वशक्तिमान परमेशरे राजे तेते जमीना दे तित्तर बित्तर कित्ते,

तेबे एड़ा लगेया मानो सलमोन पाह्ड़ो पाँदे बर्फ पड़ने लगी री।

15 बाशानो रा पाह्ड़ परमेशरो रा पाह्ड़ ए;

बाशानो रा पाह्ड़ बऊत ऊच्चा पाह्ड़ ए।

16 ओ ऊच्चे पाह्ड़ो, तुसे तेस पाह्ड़ो खे ईर्ष्या करी की कऊँ कूरने लगी रा,

जेते पाह्ड़ो खे परमेशरे आपणा राज्य करने रिया तँईं चूणी राखेया

ओर जेते पाँदे प्रभुए जुगो-जुगो तक रणा?

17 परमेशरो रे रथ बीई ह्जार, बल्कि ह्जारो ए,

प्रभु तिना बीचे ए, जेड़ा से सीनै पाह्ड़ो री पवित्र जगा रे ए।

18 जेबे परमेशर चोटिया पाँदे आऊणा; तेस आपू साथे बऊत कैदी लई जाणे,

तेस हठ करने वाल़े लोका ते बी पेंट लणी।

यहोवा परमेशर सदा खे तेथी ई रणा।*68:18 इफिसि 4:8

19 तन्य ए प्रभु जो हर रोज म्हारा बोज चकोआ;

सेई म्हारा उद्धारकर्ता परमेशर ए। सेला

20 सेई आसा खे बचाणे वाल़ा परमेशर ठईरेया;

प्रभु परमेशर मौता ते बी बचाओआ।

21 पक्का परमेशरो आपणे दुश्मणा रे सिर

ओर तेस माणूंए री बाल़ा साथे परी री खोपड़िया पाँदे बायी-बायी की से चूर-चूर करी देणी

जो आपणे पापो ते परी रिया बाटा रे चलदा रओआ।

22 यहोवा बोलोआ, "मां आपणे दुश्मण बाशानो ते बल्कि समुद्रो रिया थालिया ते बी वापस लई आऊणे,

23 ताकि तूँ आपणे पैरा खे दुश्मणा रे खूनो रे डबोए

ओर तेरे दुश्मण तेरे कुत्तेया रा इस्सा ठईरो।"

24 ओ परमेशर, तेरी जीती की वापस आऊणे री शोभा-यात्रा दिशोईया;

मेरे परमेशर, मेरे राजे री शोभा-यात्रा पवित्र जगा रे प्रवेश करदे ऊए दिशोईया।

25 गाणे वाल़े आगे-आगे ओर तारा वाल़े बाजे बजाणे वाल़े पीछे-पीछे गये,

तिना रे चऊँ कनारे कुआँरिया डफली बजाओ थिया।

26 तेसरे लोका रिया सबा दे परमेशरो री स्तुति करो;

ओ याकूबो रे कराने रे लोको, यहोवे री स्तुति करो!

27 तेती सबी ते छोटा गोत्र बिन्यामीन तिना री अगुवाई करने लगी रा,

तिना रे चूण्डो रे यहूदा रे परदान ओर तिना री सभा समेत जबूलून

ओर नप्ताली गोत्रो रे बी परदान ए।

28 तेरे परमेशरे आपणी सामर्थ दखाई राखी;

ओ परमेशर, आपणी सामर्था खे आसा पाँदे प्रकट कर,

जिंयाँ तैं पईले प्रकट कित्ती।

29 तेरे यरूशलेमो रे मन्दरो रिया बजा ते

राजेया तेरिया तँईं पेंट ल्याऊणी।

30 नगल़ा बीचे रणे वाल़े जंगल़ी डांगरा खे,

साँडा रे चूण्डा खे ओर देशा-देशा रे बाच्छूआ खे थिड़क।

तिना चाँदिए रे टुकड़े लई की आत्म-समर्पण करना;

जो लोक युद्धो ते खुश रओए, प्रभुए सेयो तित्तर बित्तर करीते।*68:30 यहेजकेल 29:3

31 मिस्र देशो ते अधिकारी आऊणे;

कूश*68:31 इथोपिया देशो रे लोका आपणे आथ परमेशरो रिया तरफा खे फुर्तिया रे फैलाणे।

32 ओ तरतिया पाँदले राज्य-राज्य रे लोको, परमेशरो रा गीत गाओ;

प्रभुए री तारीफा रा पजन गाओ! सेला

33 जो सबी ते ऊच्चे सदा रणे वाल़े स्वर्गो रे संवार ऊई की चलोआ,

देखो, से आपणी वाणी सुणाओआ, से गम्भीर वाणी शक्तिशाली ए।

34 परमेशरो री सामर्था री स्तुति करो,

तेसरी महानता इस्राएलो पाँदे छाई री

ओर तेसरी सामर्थ सर्गो रे दिशोई।

35 ओ परमेशर, तूँ आपणियां पवित्र जगा रे डरो जोगा ए,

इस्राएलो रा परमेशर ई आपणी प्रजा खे सामर्थ

ओर शक्ति देणे वाल़ा ए। परमेशर तन्य ए।