Salmos 17

अत्याचारिए ते बचणे रिया तँईं प्रार्थना

दाऊदो री प्रार्थना

1 सुणो, ओ प्रभु, न्याय रिया तँईं मेरा जोरे की बोलणा;

मताद करने खे मेरे रोणे पाँदे त्यान देयो!

मेरी बिना कपटो री प्रार्थना सुणी लो।

2 सिर्फ तुसेई बोली सकोए कि आऊँ बेकसुर आ,

कऊँकि सिर्फ तेरिया ई आखी न्याय खे देखी सकोईया।

3 तूँ जाणेया कि राती दे बी आऊँ क्या सोचूँआ; तैं परखी की जाणी ला रा कि आऊँ क्या बोलूँआ ओर क्या करूँआ, ओर तूँ जाणेया कि मैं कदी बी चूठ ना बोलणे री ठाणी ली री ए।

4 मैं ओरी जेड़े काम नि कित्ते;

मैं हमेशा सेई कित्तेया जो सई ए,

ओर मैं दूजेया माणूंआ साथे गल़त बर्ताव नि कित्तेया ए।

5 आऊँ हमेशा तेरिया ई बाटा दे चलदा आई रा,

ओर कदी बी तिजी ते पटकी नि रया।

6 ओ परमेशर, मैं तांते प्रार्थना करी राखी, कऊँकि तां माखे उत्तर देणा।

मेरिया तरफा खे त्यान देई की मेरी बिनती सुणी लओ।

7 तूँ माखे दस कि तूँ मांते ईमानदारिया ते प्यार करेया।

आपणियां महान शक्तिया ते तिना लोका खे बचा

जो आपणे दुश्मणा ते बचणे रिया तँईं तां पाँदे परोसा करोए।

8 आपणियां आखी रिया पुतलिया जेड़े माखे सई-सलामत राख;

आपणे पंखा निठे माखे लकोई की राख।

9 तिना दुष्टा ते जो मां पाँदे अत्याचार करोए,

मेरे प्राणा रे दुश्मणा ते जिने आऊँ केरी राखेया।

10 तिने आपणा दिल पात्थरो जेड़ा काठा करी राखेया;

तिना रे मुंए ते कमण्डो रिया ई गल्ला निकल़ोईया।

11 तिने हर कदमो पाँदे आऊँ केरी राखेया;

सेयो माखे जमीना दे पटकणे खे मेरिया ताका रे ए।

12 सेयो तेस शेरो जेड़े ए जो फाड़ने खे त्यार बैठी रे,

ओर जवान शेरो जेड़ा ए जो लूकी की शकारो खे न्याल़ो आ।

13 प्रभु, उठ!

तिना रा सामणा कर ओर तिना खे थाले पटकी दे!

आपणियां तलवारी रे जरिए मेरे प्राणो खे दुष्टो ते बचा।

14 ओ यहोवा, आपणियां शक्तिया ते माखे तिना लोका ते बचा जो सिर्फ एते दुनिया रिया चीजा ते ई प्यार करोए।

पर तूँ तिना लोका खे बऊत सारा खाणा देआ जिना ते तूँ बऊत प्यार करेया;

तिना रे बच्चेया गे बी बऊत चीजा ऊणिया जिना रे अक्कदार तिना रे पोते ऊणे।

15 पर मां तो निर्दोष ऊई की तेरे मुंए रा दर्शण करना; कऊँकि आऊँ निर्दोष ए,

जेबे मां जागणा तेबे मां प्रभुए रा दर्शण देखी की सन्तुष्ट ऊणा।*17:15 पजन 4:6; 7:1; 1 यूहन्ना 3:2