1 ओ प्रभु, मां तेरी सराईणा करनी,

कऊँकि तैं आऊँ गईराईया ते खींजी की ऊबे निकयाल़ी राखेया

ओर मेरे दुश्मणा खे मां पाँदे खुशी नि मनाणे दित्ती।

2 ओ मेरे प्रभु परमेशर,

आऊँ तेरिया मतादा रिया तँईं रोया ओर तैं आऊँ तन्दरूस्त करिता।

3 ओ प्रभु, जेबे आऊँ मरने ई वाल़ा था तो तैं आऊँ बचाई ला।

आऊँ लगभग मरी गया था, पर तैं माखे ठीक ऊणे दे मताद कित्ती।

4 ओ प्रभुए रे पग्तो,

प्रभुए रा पजन गाओ

ओर तेसरे पले कामा खे याद करदे ऊए तेसरे पवित्र नाओं रा तन्यवाद करो।

5 यहोवे रा गुस्सा तो थोड़ी जी देरा रा ओआ,

पर तेसरी दया जिन्दगी परो री ओई।

जे कदी राती रोणा पड़ो,

पर प्यागा खुशी मिलणी।

6 जेबे माखे कोई बी परेशानी नि ऊई थी, तो मैं आपू बोलेया था, "कोई बी माखे अराई नि सकदा।"

7 ओ यहोवा, तूँ आपणी खुशिया ते मेरिया तँईं पला था, तैं आऊँ ऊच्चे पाह्ड़ो जेड़ा सुरक्षित राखेया;

जेबे तैं मांते आपणे आपू खे लकोया,

तेबे आऊँ डरीगा।

8 ओ प्रभु, मैं ताखे ई आका पाईया

ओर प्रभुए तेई गिड़गिड़ाई की ये बिनती कित्ती,

9 "जेबे आऊँ कब्रा रे चली जाणा,

तेबे मेरिया मौता ते क्या फायदा ऊणा?

क्या मरेया रा माणूं तेरा तन्यवाद करी सकोआ?

क्या आँऊ फेर तेरी सच्चाईया रा तन्यवाद करी सकूँआ?"

10 ओ प्रभु, सुण, मां पाँदे दया कर;

ओ प्रभु, तूँ मेरी मताद कर।

11 तैं मेरा दु:ख खुशिया रे बदली ता;

तैं मेरे दु:ख दूर करीते ओर मेरे चऊँ कनारे खुशिया ई खुशिया देईतिया।

12 ताकि मेरी आत्मा तेरा पजन गांदी रओ

ओर कदी चुप नि रओ।

ओ मेरे प्रभु परमेशर,

मां सदा तेरा तन्यवाद करदे रणा।