1 ओ परमेशर, आपणे गईरे प्यारो रिया बजा ते मां पाँदे दया कर।

तेरी बड़ी दया रिया बजा ते मेरे पापो खे मटयाई दे।*

2 माखे ठीक-टंगो रे तोई की मेरे बुरे काम दूर कर

ओर मेरे पापो ते छुड़ाई की माखे शुद्ध कर!

3 आऊँ जाणूंआ कि मैं तेरी बात नि मानी।

आऊँ ये नि पूली सकदा कि आऊँ दोषी आ।

4 मैं बस तेरे ई खलाफ पाप कित्तेया ओर जो तेरिया नजरा रे बुरा ए,

सेई करी राखेया, इजी री खातर तैं जो मेरा न्याय करी राखेया से बिल्कुल सई ए।*

5 देख, जेस दिनो ते आऊँ पैदा ऊआ, तेसी दिनो ते आऊँ पापी था;

सच्चो खे, जदुए ते मेरिये माये मेरा गर्भधारण कित्तेया, तदो ते ई आऊँ पापी आ।*

6 पर तूँ चाएआ कि आऊँ पुरिया तरआ ते सच्चा ओर इमानदार रऊँ।

तूँ माखे बुद्धिमानीया ते जीवन जीऊणा सखाणा चाएआ।

7 जूबे की माखे शुद्ध कर ओर तेबे आऊँ शुद्ध ऊई जाणा,

तूँ माखे तोओ तेबे आऊँ बर्फा जेड़ा सफेद ऊई जाणा।*

8 माखे खुशी ओर आनंदो रिया गल्ला सुणा,

जेते की मेरिया आड्डिया जो तैं तोड़ी राखिया,

सेयो मगन ऊई जाओ।

9 आपणा मूँ मेरे पापो रिया तरफा ते मोड़ी दे

ओर मेरे सारे बुरे काम मटयाई दे।

10 ओ परमेशर, मेरे पीतरे शुद्ध बचारा खे पैदा कर ओर माखे दुबारा इमानदार बणा

11 माखे आपणी मौजुदगिया ते दूर नि कर ओर आपणी पवित्र आत्मा मांते नि निक्याल़।

12 आपणे कित्ते रे उद्धारो री खुशी माखे फेर देई दे

ओर नम्र आत्मा देई की माखे आसरा दे।

13 तेबे मां अपराधिया खे तेरी बाट सिखाणी,

तेबे पापी तेरिया तरफा खे फिरने।

14 ओ परमेशर, ओ मेरे उद्धारकर्ता परमेशर,

माखे अत्या रे पापो ते छुड़ाई लओ!

तेबे आऊँ तेरिया तार्मिकता रा जयजयकार करी सकूँआ।

15 ओ यहोवा, बोलणे दे मेरी मताद कर कि आऊँ तेरी स्तुति करी सकूँ।

16 कऊँकि तूँ मेलबलिया ते खुश नि ऊँदा,

नई तो आऊँ बलि चढ़ाई देंदा;

होमबलिया ते बी तूँ खुश नि ऊँदा।

17 ओ परमेशर मेरा बलिदान एक नम्र आत्मा ए,

तूँ नम्र ओर पश्चाताप करने वाल़े मनो खे बेकार नि समजदा;

18 ओ परमेशर, खुश ऊई की यरूशलेम शईरो पाँदे आपणी दया कर ओर तिना री मताद कर,

यरूशलेम शईरो री दवाला खे तूँ फेर खड़ा कर।

19 तेबे तूँ तार्मिकता रे कामो ते,

मतलब सबी डांगरा री होमबलिया ते खुश ऊणा;

तेबे लोका तेरी बेदिया पाँदे बल़द चढ़ाणे।