1 ओ परमेशर आसा पाँदे दया करो

ओर आसा खे आशीष देओ;

तूँ आसा पाँदे आपणे मुंए रा प्रयासा चमका। सेला

2 ताकि पूरी दुनिया रे लोक तेरी इच्छा जाणी लो;

ओर सबी जातिया रे तेरे उद्धारो खे जाणी लो।*

3 ओ परमेशर, देशो-देशो रे लोक तेरी सराईणा करो;

देशो-देशो रे सब लोक तेरी सराईणा करो।

4 दुनिया रे राज्य-राज्य रे लोक खुशी मनाओ

ओर जयजयकार करो; कऊँकि तां दुनिया रे देशा रे लोका रा न्याय निष्पक्षता साथे करना

ओर तरतिया रे राज्य-राज्य रे लोका खे सई बाट बताणी। सेला

5 ओ परमेशर, दुनिया रे देशो-देशो रे लोक तेरी सराईणा करो,

दुनिया रे देशो-देशो रे सब लोक तेरी सराईणा करो।

6 आसा रिये जमीने खरी फसल पजाई राखी, ओर परमेशर,

जो आसा रा परमेशर ए, तिने आसा खे आशीष देई राखी।

7 परमेशरो आसा खे आशीष देणी

ओर तरतिया रे दूर-दूर देशो रे लोका तेसरा आदर करना।