1 मां परमेशरो री दुहाई ऊच्ची आवाज करी की देणी,

मां परमेशरो री दुहाई देणी ओर तेस मेरिया तरफा खे त्यान देणा।

2 जेबे आऊँ मुसीबता दे पड़ेया; तेबे आऊँ यहोवे गे जाईकी प्रार्थना करूँआ।

पूरी रात आऊँ प्रार्थना करदे ऊए आपणे आथ फैलाई की राखूँआ, पर माखे शान्ति नि मिली।

3 आऊँ परमेशरो खे याद करी-करी की कणूंआ;

त्यान करदे-करदे मेरी आत्मा थकी जाओई। सेला

4 तूँ माखे नींजा रा टमका लगणे नि देंदा;

आऊँ एड़ा कबराईगा रा कि मेरे मुंए ते शब्द नि निकल़दा।

5 आँऊ पुराणे बखतो रे तिना दिना रे बारे दे सोचूँआ

ओर पिछले जुगो रे तिना साला रे बारे दे।

6 आऊँ राती आपणेया गाणेया खे याद करूँआ

ओर आपणे दिलो रे त्यान करूँआ, ओर मनो रे ठीक-टंगो रे बिचार करूँआ:

7 "क्या प्रभुए जुगो-जुगो खे आँऊ छाडी देणा

ओर फेर कदी तेस मां पाँदे दया नि करनी?

8 क्या तेसरी करूणा सदा खे चली जाणी?

क्या तेसरा वचन पीढ़िया-पीढ़िया खे निष्फल ऊई जाणा?

9 क्या परमेशर दया करना पूली गा?

क्या तिने आपणे गुस्से रे आई की दया करनी बन्द करिती री?"

10 मैं बोलेया, "येई तो मेरा दु:ख ए कि परमपरदानो रा दाँणा आथ बदली गा रा ए।"

11 मां यहोवे रे बड़े कामा री चर्चा करनी;

पुराणे बखतो दे जो नौखे काम तैं करी राखे सेयो मां याद राखणे।

12 मां तेरे सारेया कामा पाँदे त्यान करना

ओर तेरे बड़े नौखे काम सोचणे।

13 तूँ ओ परमेशर जो बी काम करेया; तेरा से काम पवित्र ओआ,

तूँ सबी ते बड़ा ओर महान ए, तेरा मुकाबला देवी-देवता नि करी सकदे!

14 अचम्बे रे काम करने वाल़ा परमेशर तूँई ए,

तैं देशो-देशो रे लोका पाँदे आपणी सामर्थ प्रगट करी राखी।

15 तैं आपणियां तागती साथे आपणी प्रजा याकूब

ओर यूसुफो रे वंश छुड़ाई ले रे। सेला

16 ओ परमेशर, समुद्रे तूँ देखेया, जेबे समुद्रे तूँ देखेया तेबे से डरीगा;

डूगा समुद्र बी थरथराई गा।

17 बादल़ा ते थाले पाणी आओआ ओर साथे गिड़ने री आवाज,

ओर सारे सर्गो दे बिजल़ी चमकणे लगी।

18 तूफानो बीचे तेरे गरजणे री आवाज सुणी;

दुनिया बिजल़िया साथे चमकी गी; तरती थरथराई ओर ईल्ली गी।

19 तेरी बाट समुद्रो रे ए ओर तेरी बाट डूगे पाणिए बिछिए ऊई की जाओई;

ओर तेरे पैरा रे नशाण पता नि लगदे।

20 तैं मूसा ओर हारूणो रे जरिए

आपणी प्रजा री अगुवाई पेडा जेड़ी कित्ती।