Salmos 21

प्रभुए रे उद्धारो रे खुशी

बजाणे वाल़े रे परदानो रिया तँईं दाऊदो रा पजन

1 ओ यहोवा, तेरी महान तागत राजे खे बी खुश करी देओई,

से खुशी मनाओआ कऊँकि तूँ तेसखे उद्धार देआ।

2 तैं तेसरे मनो री इच्छा पूरी करी राखी

ओर तैं तेसरी बिनतिया रा ज्वाब देआ। सेला

3 कऊँकि तेसरिया प्रार्थना रे ज्वाबो दे,

तैं तेसखे सफल ओर समृद्ध ऊणे दे मताद कित्ती

ओर तेसरे सिरो पाँदे सूईने रा मुकुट राखेया।

4 तिने तांते जिन्दगी मांगी ओर तैं तेसखे जीवनदान दित्तेया;

तैं तेसखे जुगो-जुगो री जिन्दगी देईती।

5 से बऊत प्रतापो वाल़ा ए,

कऊँकि तैं तेसखे आपणेया दुश्मणा खे अराणे दे मताद कित्ती;

तैं से प्रसिद्ध बणाईता रा।

6 तैं तेसखे आशीष दित्ती जो सदा खे बणेया दा रणा,

ओर तैं तेसगे रणे रे जरिये से खुश करिता रा ए।

7 कऊँकि राजे रा परोसा यहोवे पाँदे ए

ओर परमपरदान परमेशरो रिया दया ते तेसरा सिंहासन मजबूत बणेया रा रणा।

8 तूँ तेसखे आपणे सबी दुश्मणा ओर तिना सबी ते जो तेसते नफरत करोए तिना पाँदे कब्जा करने दे सक्षम बणाओआ।

9 जेबे तूँ प्रकट ऊणा तेबे तां आपू सामणे आपणे दुश्मण बल़दे ऊए भट्टे जेड़े जल़ाणे।

प्रभुए सेयो आपणे गुस्से ते निगल़ी लणे

ओर आगी सेयो स्वा करी देणे।

10 तां तिना री ल्वाद तरतिया पाँदा ते मटयाई देणी

ओर तिना रा वंश माणूंआ बीचा ते नाश करी देणा।

11 कऊँकि तिने तेरे खलाफ बुरा करने रा सोची राखेया,

तिने एड़ा साजिश रचाई राखेया तेबे बी सेयो सफल नि ऊणे।

12 तां सेयो पीठ दखाई की नठणे खे मजबूर करी देणे

कऊँकि तां आपणा धनुष तिना रे खलाफ चढ़ाणा।

13 ओ प्रभु, आपणी सामर्था री महानता खे प्रकट कर!

आसा गायी-गायी की तेरे पराक्रमो रा पजन सुनाणा।