1 ओ प्रभु, चट्टानी जेड़ा मेरी रक्षा करने वाल़े, आऊँ ताखे ई आका पाऊँआ।

मेरिया आका सुणी लओ!

जे तूँ मेरिया आका रा ज्वाब नि देगा तो छोड़ ई आऊँ तिना साथे मिली जाणा जो आपणियां कब्रा दे ए।

2 जेबे आऊँ मतादा रिया तँईं ताखे आका पाऊँ

ओर आँऊ तेरी परम पवित्र जगा री पीतरली कोठरिया री

तरफा खे आपणे आथ फैलाऊँ,

तेबे मेरी बिनती सुणी लया।

3 तिना बुरे काम करने वाल़ेया ओर कुकर्मी लोका साथे माखे दोषी नि ठरा,

जो आपणे पड़ोसिया साथे गल्ला तो शान्तिया रिया करोए;

पर आपणे दिलो रे बुराई राखोए।

4 तिने लोके जो कुछ बी करी राखेया तिजी रे जरिए तिना खे सजा दे

तिना खे तिना रे बुरे कामा रिया तँईं सजा दे।*

5 सेयो दुष्ट लोक प्रभुए रे कामा पाँदे

ओर तेसरे आथो रे कामा पाँदे त्यान नि करदे,

इजी री खातर तेस तिना खे सजा देणी ओर सेयो सदा खे नाश करी देणे।

6 प्रभु तन्य ए,

कऊँकि तिने मेरी बिनती सुणी।

7 प्रभु मेरी तागत ए ओर ढाला जेड़ा मेरी रक्षा करोआ;

तेस पाँदे परोसा राखणे ते मेरे मनो खे मताद मिली री,

इजी री खातर मेरा मन खुश ए

ओर मां गाणा गायी की तेसरा तन्यवाद करना।

8 प्रभु आपणी प्रजा रे लोका री तागत ए,

से आपणे अभिषिक्त राजे रिया तँईं उद्धारो जेड़ा ए।

9 ओ प्रभु, आपणे लोका रा उद्धार कर

ओर आपणे निज इस्से रे लोका खे आशीष दे

ओर एक चराणे वाल़े जेड़ा आपणे लोका खे सम्बाल़ी की राख।