बजाणे वाल़े परदानो रिया तँईं दाऊदो रा पजन

1 ओ यहोवा, मेरा परोसा तां पाँदे ए;

माखे कदी शर्मिंदा नि ऊणे देणा;

आपणी तार्मिकता रे जरिए माखे बचाई लओ।

2 ओ यहोवा, आपणा त्यान मेरिया तरफा खे लगाई की

फटाफट माखे छुड़ाई लओ।*31:2 पजन 102:2

3 कऊँकि तूँ मेरिया तँईं चट्टान ओर गढ़ो जेड़ा ए;

इजी री खातर आपणे नाओं रिया तँईं माखे सई बाट दखा

ओर माखे आगे लई चल।

4 तूँ ई ए जो माखे सम्बाल़ोआ,

माखे तेस जाल़ो ते बचा जो मेरेया दुश्मणे मेरिया तँईं बछाई राखेया,

5 आँऊ आपणा जीवन तेरे ई आथो रे सम्बाल़ी देऊँआ;

ओ प्रभु, ओ सच्चे परमेशर,

तैं आऊँ मोले लई की आजाद करी राखेया।*31:5 लूक 23:46, प्रेरित 7:59, 1 पत 4:19

6 जो बेकार मूर्तिया पाँदे मन लगाओए,

तिना ते आऊँ कृणा करूँआ,

पर प्रभु, आँऊ तां पाँदे परोसा राखूँआ।*31:6 पजन 24:4

7 आऊँ तेरी करूणा ते मगन ओर खुश ए,

कऊँकि तैं मेरे दु:ख देखे,

मेरी मुसीबता रे बखते तैं मेरी सम्बाल़ लई।

8 तैं आऊँ दुश्मणा रे आथो रे पड़ने नि दित्तेया;

पर तैं आँऊ खतरे ते बचाई राखेया।

9 ओ प्रभु, मां पाँदे दया कर, कऊँकि आऊँ मुसीबता रे ए;

मेरिया आखी बऊत रोणे रिया बजा ते कमजोर ऊई गी रिया;

मेरा प्राण ओर शरीर बी सुकी गा रा।

10 मेरी जिन्दगी पापो रिया बजा ते

ओर मेरी उम्र कणदे-कणदे कटणे लगी री,

मुसीबता रिया बजा ते मेरी तागत कटदी गई

ओर मेरिया आड्डिया दिशणे लगिया।

11 आपणे सारे बरोदिया रिया बजा ते मेरे पड़ोसिया सामणे मेरी बेज्जती ऊई री;

आपणे जाण-पछयाण वाल़ेया खे आऊँ डरो री बजा बणीगा,

जो माखे सड़का रे देखोए, सेयो तेबुई मांते दूर नठी जाओए।

12 लोक माखे पूली चूकी रे, जिंयाँ सेयो तिना लोका खे पूली जाओए जो मरी गे रे ए।

सेयो माखे टूटे रे पांडे जेड़ा बेकार समजोए।

13 मैं बऊत जणेया रे मुंए ते आपणी निंदा सुणी,

चऊँ कनारे डर ई डर ए!

जेबे तिने मेरे खलाफ आपू बीचे सम्मति करी की

मेरे प्राण लणे री साजिश कित्ती।

14 पर ओ प्रभु, मैं तो तां ई पाँदे परोसा राखी राखेया,

मैं बोलेया, "तूँई मेरा परमेशर ए।"

15 मेरी जिन्दगी तेरे आथो रे ए;

माखे मेरे दुश्मणा ते ओर मेरे सताणे वाल़ेया ते छुड़ा।

16 मां पाँदे दया कर ओर माखे बचा

कऊँकि तूँ हमेशा मांते बऊत प्यार करेया।

17 ओ प्रभु, माखे शर्मिंदा नि ऊणे दे

कऊँकि मैं ताखे आका पाई राखिया;

दुष्ट लोक शर्मिंदा ओ

ओर सेयो चुपचाप पताल़ो रे पड़े रे रओ।

18 जो कमण्ड ओर बेज्जतिया साथे तर्मिया री निंदा करोए,

तिना रे चूठ बोलणे वाल़े मूँ बंद कित्ते जाओ।*31:18 पजन 94:4, पजन 120:2

19 तैं आपणे पग्ता खे बऊत चीजा राखी रिया ए!

हर कोई जाणोआ कि तूँ कितणा पला ए,

तूँ तिना लोका री रक्षा करेया जो तां पाँदे परोसा करोए।

20 तूँ तिना खे आपणी मौजुदगिया री छाया रे माणूंआ री

साजिशा ते लकोई राखेया;

तां सेयो आपणे मण्डपो रे चगड़ेया ते लकोई की राखणे।

21 ओ यहोवा, आऊँ तेरी महिमा करूँआ,

कऊँकि तैं मां पाँदे दया कित्ती जेबे दुश्मणे आऊँ चऊँ कनारा ते केरी राखेया था।

22 मैं तो कबराई की बोलेया था, "आऊँ प्रभुए री नजरा ते दूर ऊईगा।"

पर तैं मेरिया आका प्रार्थना सुणी लईया,

जेबे मैं से मतादा रिया तँईं बुलाया।

23 ओ प्रभुए रे सारे पग्तो, तेस साथे प्यार राखो!

प्रभु सच्चे लोका री रक्षा तो करोआ,

पर जो कमण्ड करोआ,

तेसखे से ठीक-टंगो रे बदला देओआ।*31:23 पजन 97:10

24 ओ प्रभुए पाँदे उम्मीद राखणे वाल़ेयो,

ईम्मत राखो ओर बऊत मजबूत रओ।*31:24 1 कुरिन्थ 16:13