1 से माणूं बऊत ई तन्य ए

जेसरा पाप यहोवे माफ कित्तेया

ओर तेसरा पाप मिटाईता रा ओ।*

2 से माणूं बऊत ई तन्य ए,

जेस पाँदे प्रभु गल़त काम करने रा दोष नि लगांदा ओ

ओर जो सबी छल-कपटो ते छुटीगा ओ।*

3 जदुए तक मैं आपणा पाप मानी नि लया,

तदुए तक मेरा शरीर बऊत कमजोर ओर बमार ऊईगा, ओर आऊँ सारा दिन कणदा रया।

4 ओ यहोवा, तूँ माखे रात-दिन सजा देयो था, मेरी तागत ईंयाँ खत्म ऊई जिंयाँ गर्मिया दे सूका पड़ोआ। सेला

5 जेबे मैं आपणा पाप तेरे सामणे मानेया

ओर आपणे बुरे काम नि छुपाए ओर बोलेया, "मां आपणे पाप प्रभुए रे सामणे मानी लणे,"

तेबे तैं मेरे बुरे काम ओर पाप माफ करीते।* सेला

6 इजी बजा ते हर एक पग्त तांते एड़े बखते प्रार्थना करो

जेबे कि तूँ मिली सकेया।

पक्का जेबे पाणिए री बड़ी बाढ़ आऊणी तेबे बी तेस पग्तो गे नि पऊँचणी।

7 तूँ मेरा आसरा लणे री जगा ए;

आऊँ तेरे उद्धारो रा गाणा जोरे की गाऊँआं, कऊँकि तूँ मेरी रक्षा करेया। सेला

8 प्रभु ये बोलोआ, "मां ताखे अक्ल देणी

ओर जेते बाटा रे तां चलणा ओगा तिदे मां ताखे सला देणी;

मां तां पाँदे आपणी नजर लगाई री राखणी।"

9 इजी री खातर तुसे कोड़े ओर खच्चरा जेड़े नि बणो जिना खे समज नि ऊँदी,

तिना रा जोश रास ओर लगामा साथे रोकणा पड़ोआ,

नई तो सेयो तेरे वशो रे नि आऊणे।

10 दुष्ट माणूंआ खे तो बऊत तकलीफ ऊणी;

पर जो प्रभुए पाँदे परोसा राखोआ से करूणा ते केरेया रा रणा।

11 ओ तर्मियो, प्रभुए रे कामा ते खुश ओर मगन रओ

ओर ओ सारे सीदे मनो वाल़ेयो खुशिया साथे जयजयकार करो!