Salmos 32

माफी पाणे री आशीष

1 से माणूं बऊत ई तन्य ए

जेसरा पाप यहोवे माफ कित्तेया

ओर तेसरा पाप मिटाईता रा ओ।*32:1 रोमी 4:7

2 से माणूं बऊत ई तन्य ए,

जेस पाँदे प्रभु गल़त काम करने रा दोष नि लगांदा ओ

ओर जो सबी छल-कपटो ते छुटीगा ओ।*32:2 रोमी 4:8

3 जदुए तक मैं आपणा पाप मानी नि लया,

तदुए तक मेरा शरीर बऊत कमजोर ओर बमार ऊईगा, ओर आऊँ सारा दिन कणदा रया।

4 ओ यहोवा, तूँ माखे रात-दिन सजा देयो था, मेरी तागत ईंयाँ खत्म ऊई जिंयाँ गर्मिया दे सूका पड़ोआ। सेला

5 जेबे मैं आपणा पाप तेरे सामणे मानेया

ओर आपणे बुरे काम नि छुपाए ओर बोलेया, "मां आपणे पाप प्रभुए रे सामणे मानी लणे,"

तेबे तैं मेरे बुरे काम ओर पाप माफ करीते।*32:5 1 यूह. 1:9 सेला

6 इजी बजा ते हर एक पग्त तांते एड़े बखते प्रार्थना करो

जेबे कि तूँ मिली सकेया।

पक्का जेबे पाणिए री बड़ी बाढ़ आऊणी तेबे बी तेस पग्तो गे नि पऊँचणी।