पजन 61

रक्षा रिया तँईं प्रार्थना

परदान बजाणे वाल़ेया रिया तँईं तारा वाल़े बाजे साथे दाऊदो रा पजन

1 ओ परमेशर, मेरी पुकार सुण,

मेरी प्रार्थना रिया तरफा खे त्यान दे।

2 नराजगिया दे ओर करो ते दूर आऊँ तुसा खे आका पाऊँआ!

माखे सुरक्षित जगा दे लई चलो,

केसी एड़े मजबूत गढ़ो पाँदे जेती आँऊ सई-सलामत रई सकूँ, माखे लई चल।

3 कऊँकि तूँ मेरी शरण लणे री जगा ए

ओर दुश्मणा ते बचणे रिया खातर ऊच्चे किले जेड़ा ए।

4 आऊँ तेरे तम्बूए रे जुगो-जुगो तक रणा चाऊँआ।

आऊँ तेरे पंखा री आड़ा रे शरण लणा चाऊँआ। सेला

5 ओ परमेशर, तैं मेरिया मान्नता सुणिया,

जो तेरे नाओं रे पग्त ए, तैं तिना री इच्छा पूरी करी राखी।

6 तां राजे री उम्र बऊत बढ़ाणी;

तेसरी उम्रा रे साल कईया पीढ़िया रे बराबर ऊणे।

7 से परमेशरो सामणे सदा बणेया रा रणा;*61:7 तेसरा राज्य

तूँ आपणी करूणा ओर सच्चाईया खे ठराई की राख कि सेयो तेसरी रक्षा करो।

8 ईंयाँ मां सदा तेरे नाओं रा पजन गायी-गायी की

आपणी मान्नता हर दिन पुरिया करेया करनिया।