Salmos 49

तअन-दौलता पाँदे परोसा राखणे री मूर्खता

बजाणे वाल़े परदानो रिया तँईं कोरह वंशिया रा पजन

1 ओ देशो-देशो रे सारे लोको ये सुणो! ओ दुनिया रे सारे रणे वाल़ेयो, तुसे सब त्यानो देओ!

2 छोटे-बड़े, तनवान ओ या गरीब, सब माणूं सुणो कि आऊँ क्या करने लगी रा।

3 आऊँ बुद्धिया रिया गल्ला बोलूँआ;

ओर मेरे दिलो रिया गल्ला समजणे जोगिया ऊणिया।

4 आऊँ बुद्धिया रिया गल्ला रे बारे दे सोचूँआ,

ओर आऊँ आपणी बीणा बजांदे ऊए तिना बुद्धिया रे वचना रा मतलब बताऊँआ।

5 बिपदा रे बखते आँऊ नि डरदा

जेबे मेरे दुश्मण माखे चऊँ कनारे ते मेरी बुराई करने खे केरी राखोए।

6 दुष्ट लोक आपणी सम्पत्तिया पाँदे परोसा राखोए

ओर आपू गे बऊत जादा पैसेया रा कमण्ड करोए,

7 आसा बीचा ते कोई बी माणूं आपू खे किंयाँ बी छुड़ाई नि सकदा

ओर ना परमेशरो खे आपणे प्राणो रे बदले प्राश्चितो रिया तँईं कुछ कीमत देई सकोआ,

8 कऊँकि से कीमत बऊत जादा ए,

जेते खे कोई बी नि चुकाई सकदा।

9 कोई एड़ा नि ए जो सदा जिऊँदा रई सको,

ओर कब्रा रे नि जाओ।

10 कोई बी देखी सकोए कि अक्लमंद बी मरोए

ओर मूर्ख ओर डांगर सरीखे माणूं दोनो मरी की आपणी सम्पत्ति ओरी खे छाडी जाओए।

11 तिना री कब्र ई तिना रा सदा रणे वाल़ा कअर ए

तिना गे आपणी जमीन ओर कअर बी था, जेते पाँदे तिना रा नाओं था,

12 पर माणूं हमेशा खे जिऊँदा नि रंदा, पले ई से बऊत अमीर ओ।

से डांगरो जेड़ा ई मरना।

13 एड़ा तिना साथे ओआ जो आपणे कामा पाँदे मूर्खता ते परोसा करोए,

जो आपू गे सबी चीजा ते खुश ओए। सेला

14 सेयो मानो अधलोको रिया पेडा-बाकरिया ठराई राखे,

मौत तिना खे चराणे वाल़ा गाद्दी ठईरनी;

तर्मिया तिना पाँदे राज करना,

सेयो सीदे कब्रा रे चली जाणे

ओर तिना रा शरीर तेती सड़ी जाणा।

अधलोक ई तिना री रणे री जगा ऊणी।

15 पर परमेशरो आँऊ छुड़ाई लणा;

तेस आँऊ मौता री शक्तिया ते बचाई लणा। सेला

16 जेबे कोई माणूं अमीर ऊई जाओ

ओर तेसरे कअरो रा मान-सम्मान बढ़ी जाओ,

तेबे तैं डरना नि।

17 जेबे से मरी जाओआ तेबे से आपू साथे कुछ बी नि लई जाई सकदा

ओर ना ई तेसरा मान-सम्मान*49:17 तअन तेस साथे कब्रा रे जाणा।

18 जदुए तक एक अमीर माणूं जिऊँदा ए से आपू खे तन्यवाद देओआ,

ओर तेसरिया सफलता रिया बजा ते सब लोक तेसरी तारीफ करोए।

19 तेबे बी से आपणे मरे बुजुर्गा साथे मलाया जाणा,

जेती न्हेरा सदा खे रओआ।

20 माणूंआ री समज तिना खे मौता ते दूर नि राखी सकदी,

सेयो नाशवान डांगरा जेड़े ए।