1 ओ प्रभु, आऊँ तेरी शरणा रे आई रा,

मेरी उम्मीद कदी नि टूटो!

2 तूँ माखे आपणी तार्मिकता रे जरिए छुड़ाई लओ

ओर माखे बचा; मेरी तरफा खे त्यान दे ओर मेरी मताद कर!

3 मेरिया रक्षा रिया तँईं मेरी सई-सलामत जगा ओर एक मजबूत गढ़ बण;

तूँ ई मेरी जगा ओर रक्षा ए।

4 ओ मेरे परमेशर, दुष्ट, बुरे ओर क्रूर माणूंआ रे आथा ते मेरी रक्षा कर।

5 कऊँकि ओ प्रभु परमेशर,

तूँई मेरी उम्मीद ए, बचपनो तेई मेरा आधार तूँई ए।

6 जन्मो तेई मैं तेरा आसरा लया;

से तूँई था जिने मेरिया माया रे गर्भो ते आँऊ निकयाल़ेया था;

इजी री खातर मां सदा तेरी स्तुति करदे रणा।

7 आऊँ बऊत जणेया खे चमत्कार बणी रा;

पर तूँई मेरी शरण लणे री जगा ए।

8 मेरे मुंए ते तेरा गुणगाण

ओर तेरी महिमा लगातार ऊँदी रओ।

9 स्याणदे बखते माखे नि छाडेया;

जेबे मेरी तागत कम ऊई जाओ तो माखे नि छाडेया।

10 जो मेरे प्राणो रिया ताका रे ए सेयो आपू बीचे सम्मति करोए।

मेरे दुश्मण मेरे बारे ये गल्ला बणाओए कि

11 सेयो एकी दूजे ते बोलोए कि परमेशरे से छाडीता रा; तेसरा पीछा करी की तेसखे पकड़ी लओ,

कऊँकि तेसखे छुड़ाणे वाल़ा कोई नि ए।

12 ओ परमेशर, मांते दूर नि रओ;

ओ परमेशर मेरी मताद करने रिया तँईं देर नि कर!

13 जो मेरे प्राणो रे टोल़ा रे ए, तिना री उम्मीद टूटो ओर सेयो नाश ऊई जाओ;

जो मेरा नुकशाण करना चाओए, सेयो निंदा ओर अनादरो रे पड़ी जाओ।

14 आऊँ हमेशा तां पाँदे परोसा करूँआ,

मां तेरी जयजयकार ओर बी जादा करनी।

15 मां पूरा दिन आपणे मुंए ते तेरी तार्मिकता री

ओर तेरे कित्ते रे उद्धारो रे कामा री ओर तेरे अणगिणत कामा री चर्चा करदे रणा।

कऊँकि तिना रा पूरा ब्योरा मेरिया समजा ते पोरे ए।

16 मां आपणे प्रभु परमेशरो रे सामर्था रे कामा रा बखाण करदे ऊए आऊणा,

प्रभु, मां बस तेरी ई तार्मिकता री चर्चा करदे रणा।

17 ओ परमेशर, तूँ तो माखे बचपनो तेई सिखांदा आई रा

ओर आऊँ एबुए तक तेरे अचम्बे रे कामा रा प्रचार करदे आई रा।

18 इजी री खातर ओ परमेशर, जेबे आऊँ स्याणा ऊई जाऊँ

ओर मेरे बाल़ सफेद ऊई जाओ, तेबे बी तूँ माखे नि छाडेया,

जदुए तक आऊँ आऊणे वाल़ी पीढ़िया रे लोका गे तेरिया बांई री तागत

ओर पराक्रमो रे बारे नि सुणाई देऊँ।

तदुए तक माखे जिऊँदा राखेया।

19 ओ परमेशर, तेरी तार्मिकता बऊत महान ए।

जिने बड़े-बड़े काम करी राखे, ओ परमेशर तां बराबर कोई बी नि ए।

20 तैं तो आसा गे बऊत कठण कष्ट दखाई राखे,

पर तां एबे फेर आसे जिऊँदे करने ओर तरतिया री डूगिया जगा ते फेर बारे निकयाल़ने।

21 तां मेरी इज्जत बड़ाणी

ओर माखे दुबारा ते शान्ति देणी।

22 ओ मेरे परमेशर, मां सारंगी बजाई की तेरी सच्चाईया री सराईणा करनी;

ओ इस्राएलो रे पवित्र परमेशर, मां बीणा बजाई की तेरा पजन गाणा।

23 जेबे मां तेरा पजन गाणा,

तेबे आपणे मुंए ते ओर आपणे प्राणो ते बी,

जो तैं बचाई ला रा, जयजयकार करनी।

24 मां तेरी तार्मिकता री चर्चा लगातार करदे रणा;

कऊँकि जो लोक मेरा नुकशाण करने री कोशिश करो थे,

तिना री उम्मीद टूटी गी ओर सेयो बेज्जत ऊईगे।