1 ओ यहोवा, ओ बदला लणे वाल़े परमेशर,

ओ बदला लणे वाल़े परमेशर, आपणा तेज दखा!*

2 ओ तरतिया रा न्याय करने वाल़े, उठ!

ओर कमण्ड करने वाल़ेया ते बदला लओ!

3 ओ प्रभु, दुष्ट लोका कदुओ तक,

दुष्ट लोका कदुओ तक बडयाईया मारदे रणे?

4 सेयो लगातार टीठ गल्ला करदे रओए,

ओर सब अनर्थ काम करने वाल़े बडयाईया मारोए।

5 ओ यहोवा, इने तेरी प्रजा तंग करिती दी!

जो लोक तेरे नीज पाअग ए तिना खे दु:ख देओए।

6 सेयो बिदुआ ओर परदेशिया री अत्या करोए

ओर अनाथ बच्चेया खे मारी देओए;

7 सेयो बोलोए, "यहोवा माखे नि देखदा,

याकूबो रा परमेशर बचार नि करदा।"

8 अरे नासमज लोको तुसे बचार तो करो

ओर ओ मूर्खो, तुसे कदी समजदार ऊणे?

9 जिने कान दित्ते, क्या से आपू नि सुणदा?

जिने आख बणाई, क्या से आपू नि देखदा?

10 जो जातिया-जातिया खे ताड़ना देओआ

ओर माणूंआ खे समज देओआ, क्या तेस समजयाणा नि?

11 प्रभु माणूंआ रे बचारा खे जाणोआ

ओर से ये बी जाणोआ कि माणूं सिर्फ साओ जेड़ा ए।*

12 ओ यहोवा, से मर्द बऊत ई तन्य ए जेसखे तूँ ताड़ना देया

ओर ईंयाँ तेसखे आपणा बिधान सिखाओआ,

13 तूँ तेसखे मुसीबता रे दिने तेस बखतो तक शान्ति देंदा रओआ,

जदुए तक दुष्टा खे गड्डा नि खणेया जांदा।

14 कऊँकि यहोवे आपणी प्रजा रे लोक नि त्यागणे,

तेस आपणा निज पाअग नि छाडणा;*

15 पर न्याय बी तार्मिकता रे मुताबिक कित्तेया जाणा

ओर निष्कपट माणूंआ तिजी रा अनुशरण करना।

16 बुरे काम करने वाल़ेया रे खलाफ मेरी तरफा खे कुण खड़ा ऊणा?

मेरिया तरफा ते अनर्थ काम करने वाल़ेया रा सामणा केस करना?

17 जे प्रभुए मेरी मताद नि कित्ती ऊँदी,

तो थोड़ी जिया देरा बीचे आऊँ मरी जांदा।

18 जेबे मैं बोलेया, "मेरा पैर खड़ीसणे लगी रा,"

तेबे ओ प्रभु, तेरी करूणे माखे साअरा दित्तेया।

19 जेबे मेरे दिलो रे चिन्ता बढ़ी जाओईया,

तेबे ओ प्रभु, तेरी दित्ती री शान्तिया साथे माखे सुख मिलोआ।*

20 क्या तेरे ओर दुष्ट माणूंआ रे सिंहासनो बीचे समजौता ऊई सकोआ,

जो नियमा री आड़ा दे हुड़दंग मचाओए?

21 सेयो तर्मिया रा प्राण लणे खे चूण्ड बणाई की कट्ठे ओए,

ओर निर्दोष माणूंआ खे प्राणदण्ड देओए।

22 पर प्रभु मेरा गढ़,

ओर मेरा परमेशर मेरी शरण लणे री मजबूत चट्टान ए।

23 परमेशरे तिना रे अनर्थ काम तिना पाँदे ई वापस करीते

ओर तेस सेयो तिना रिया बुराईया साथे ई सत्यानाश करने।

म्हारे प्रभु परमेशरो सेयो जरूर नाश करने।