1 Uhoraho igitandara canje ahimbazwe,

yigisha amaboko yanje kugwana,

n’intoke zanje kuja mu ntambara.

2 Ni Imana yanje y’urukundo n’igihome kinkingira,

umunara nihishamwo n’umurokozi wanje,

inkinzo yanje, uwo mpungirako,

acisha bugufi amoko musi y’ibirenge vyanje.

3 Uhoraho, abantu ni iki aho ubitwararika,

canke abana b’abantu aho ubiyumvirako?

4 Bameze nk’impwemu zihumetswe;

imisi yabo ni nk’igitutu kirengana gusa.

5 Uhoraho, ugurura ijuru ryawe, umanuke kw’isi;

kora ku misozi, kugira ngo ipfunduke umwotsi.

6 Rungika umuravyo usanzaze umwansi;

rasa imyampi yawe ubasanzaze.

7 Ramvura ukuboko kwawe uri iyo mw’ijuru;

untabare undokore

unkize amazi asuriranya,

unkure mu kuboko kw’abanyamahanga;

8 akanwa kabo kuzuye ibinyoma,

amaboko yabo y’i buryo arimwo ivy’ubugunge.

9 Mana yanje, nzokuririmbira indirimbo nsha,

nzogucurarangira inanga y’imirya cumi,

10 wewe uha abami intsinzi,

ugakiza umusavyi wawe Dawidi inkota yica.

11 Ndokora untabare;

unkure mu maboko y’abanyamahanga

akanwa kabo kuzuye ibinyoma,

amaboko yabo y’i buryo ni ingunge.

12 Maze abahungu bacu, mu buto bwabo,

bazomera nk’imivyaro yatabiwe neza,

abakobwa bacu na bo bazoba nk’inkingi

zabarijwe gushariza ikirimba.

13 Ibigega vyacu bizokwuzura

ivyimburwa vy’ubwoko bwose.

Intama zacu zizogwira incuro ibihumbi,

incuro ibihumbi cumi ziri ku misozi yacu;

14 inka zacu zizokwega imitwaro iremereye.

Nta birengero bizoba mu mpome zacu,

nta bazojanwa nk’inyagano,

nta bazoniha bari mu mayira yacu.

15 Hahiriwe ihanga ibi bizoshikako;

hahiriwe ihanga rifise Uhoraho nk’Imana yaryo.