1 Muri wewe, Uhoraho, ni ho mpungiye;

sinze nigere maramara;

unkize ku bw’ukugororoka kwawe.

2 Ntega ugutwi,

nyaruka untabare;

umbere igitandara mpungiramwo,

igihome gikomeye kinkingira.

3 Ni wewe gitandara canje n’igihome canje,

undongore kandi ungire inama ku bw’izina ryawe.

4 Undinde kugwa mu mutego watezwe imbere yanje,

kuko ari wewe buhungiro bwanje.

5 Mu biganza vyawe ni ho nshize impwemu yanje;

nkiza, Uhoraho, Mana yanje yo kwizigirwa.

6 Nanka abumira ku bigirwamana bitagira ikimazi;

ariko jeho, nizigira Uhoraho.

7 Nzonezerwa mpimbarirwe urukundo rwawe,

kuko wabonye umubabaro wanje

ukamenya amagorwa y’umutima wanje.

8 Ntiwandekuriye mu maboko y’umwansi

ariko washize ibirenge vyanje ahagutse.

9 Ngirira ikigongwe, Uhoraho, kuko ndi mu mubabaro;

amaso yanje aruhijwe n’umubabaro,

umushaha wanje n’umubiri wanje bimazwe n’agahinda.

10 Ubugingo bwanje bumazwe n’umubabaro

imyaka yanje imazwe n’ukuniha;

inkomezi zanje ziraheze kubera amarushwa,

n’amagufa yanje aradendebukiwe.

11 Kubera abansi banje,

mbaye ruvumwa muri bagenzi banje

n’abakunzi banje pfampfe bangiye kure;

abambona mu mayira barampunga.

12 Ndibagiranywe nk’uwapfuye;

mbaye nk’inkono imenetse.

13 Kuko numva ubwongoshwe bwinshi:

"Ibiterabwoba impande zose!"

Bangira inama mbi

bagira imigabo yo kunyica.

14 Ariko nizigiye wewe, Uhoraho;

ndavuga nti: "Uri Imana yanje."

15 Ibihe vyanje biri mu biganza vyawe;

nkura mu maboko y’abansi banje,

mu maboko y’abampiga.

16 Murikishiriza mu nyonga hawe umusavyi wawe;

nkiriza mu rukundo rwawe rudahera.

17 Ntundeke ngo maramare, ewe Uhoraho,

kuko ngutakambiye;

ariko abanyakibi babe ari bo bamaramara

bamanuke mu gacerere baja ahantu h’abapfuye.

18 Iminwa yabo ibesha nizibwe,

kuko bavugana ubwibone bavuga nabi umugororotsi

buzuye ubwishime n’akagaye.

19 Ese ingene ivyiza ari vyinshi

ivyo wabikiye abakwubaha,

ngo ubicuncuburire mu maso ya bose,

ku bahungira muri wewe.

20 Mu bwihisho bwo mu nyonga hawe ni ho ubahisha

inama mbi abandi babagira;

ubarindira mu nzu yawe mu mahoro

ababavuga nabi.

21 Ishimwe ni iry’Uhoraho,

kuko yanyeretse ibitangaza vyo mu rukundo rwiwe

igihe nari mu gisagara gikikujwe n’abagiteye.

22 Kubera ubwoba nari mfise naravuze nti:

"Nkuwe mu nyonga zawe!"

Ariko wumvise ugutakamba kwanje

igihe naguhamagara ngo untabare.

23 Nimukunde Uhoraho, yemwe bizigirwa biwe!

Uhoraho azigama abamutunganiye,

ariko abishira hejuru abasubiriza mu nkoko ibihwanye n’ivyo bakoze.

24 Nimukomere mureme mu mitima,

yemwe mwese abizigira Uhoraho.