1 Yemwe mahanga mwese, nimwumve ibi;

yemwe ababa kuri iyi si mwese, nimwumvirize,

2 abaciye bugufi n’abashizwe hejuru,

baba abatunzi canke abakene:

3 Akanwa kanje kagira kavuge amajambo y’ubwenge;

ukurimbura kw’umutima wanje kuzobaha gutahura.

4 Ndahindukiriza ugutwi kwanje ku mugani;

mu murya w’inanga ndasigura igisokozo.

5 Ni kuki notinya igihe imisi mibi ije,

mu gihe abantu b’ingunge bankikuje;

6 abizigira ubutunzi bwabo

bakirata ibihinda vyabo vyinshi?

7 Nta n’umwe ashobora gucungura ubugingo bw’uwundi

canke ngo abutangire incungu ku Mana;

8 incungu y’ubuzima bw’umuntu ni iy’igiciro kinini,

nta co umuntu yoriha ngo akwize ikiguzi;

9 kugira ngo barambe ibihe vyose

ntibabone ukubora.

10 Kuko mbona ko umunyabwenge apfa,

igipfu n’ikijuju na bo bagahona,

bagasigira abandi ubutunzi bwabo.

11 Imva zabo ni zo zizoba amazu yabo y’ibihe bidashira,

aho bazoba ibihe bizokuranwa n’ibindi,

naho amatongo yabo bari bayise amazina yabo.

12 Abantu naho bogira ibihinda, ntibahoraho;

bameze nk’ibikoko bipfa gusa.

13 Iyi ni yo nzira y’abiyizigira,

n’ababakurikira, bakunda ivyo bavuga.

14 Bameze nk’intama kandi bagerewe gupfa;

urupfu ni rwo ruzoba umwungere wabo

(ariko abatunganye bazobasiribanga mu gitondo).

Ubwiza bwabo buzoborera mu mva,

kure y’amazu yabo ajererenze.

15 Ariko Imana izoncungura inkure ahantu h’abapfuye;

ni ukuri izonjana iwe.

16 Ntuze ugire ubwoba abandi nibarushaho gutunga,

ubwiza bw’amazu yabo bukaba bwinshi;

17 kuko ata co bazojana nibapfa,

ubwiza bwabo ntibuzojana na bo.

18 Naho igihe bakiriho biyita abahirwe;

kandi bagakomerwa amashi kubera ivyo bashitseko;

19 bazohamvya ababitangiye imbere,

batazosubira kubona umuco w’ubugingo.

20 Abantu bafise ubutunzi ariko badafise ugutahura

bameze nk’ibikoko bipfa.