1 Inyenkomezi, Imana, Uhoraho,

aravuze ahamagara abo mw’isi

uhereye iyo izuba riserukira ukageza iyo rirengera.

2 Kuva i Siyoni, h’ubwiza buhebuje,

Imana irakayanganye.

3 Imana yacu iraje

kandi ntizocereza;

umuriro uratongora imbere yayo,

kandi akikijwe n’igihuhusi gihambaye.

4 Ahamagara amajuru yo hejuru,

agahamagara n’isi, kugira ngo acire imanza abantu biwe ati:

5 "Nimunyegeranirize aba bantu batoranijwe,

abo twagiranye isezerano na bo hatanzwe ikimazi."

6 Kandi amajuru yamamaza ukugororoka kwiwe,

kuko ari Imana ica imanza zibereye.

7 "Nimwumve, bantu banje, kuko ngira mvuge;

nzokwagiriza, ewe Isirayeli:

ndi Imana, Imana yawe.

8 Sinzozana ivyo kukwagiriza bijanye n’ibimazi vyawe

canke bijanye n’amashikanwa yawe aturiwe,

vyama imbere yanje na ntaryo.

9 Sinkeneye impfizi zivuye mu mpongore zanyu

canke impene zo mu mpongore zanyu,

10 kuko ibikoko vyose vyo mw’ishamba ari ivyanje,

n’amasho yo ku mirambi igihumbi.

11 Ndazi inyoni zose zo ku misozi,

n’udukoko tuguruka two ku misozi ni utwanje.

12 Nosonza sinobikubwira,

kuko isi ari iyanje, n’ibiri muri yo vyose.

13 Mbega ndarya inyama z’impfizi

canke ndanywa amaraso y’impene?

14 Nimushikanire Imana ikimazi c’ishimwe,

mushitse ivyo mwasezeraniye Iyisumbavyose,

15 maze muze munyambaze mu gihe c’amagorwa;

nzobakiza, namwe muzompesha icubahiro."

16 Ariko umunyakibi, Imana iramubwira iti:

"Wiruhiriza iki uvuga ivyagezwe vyanje

canke ucisha isezerano ryanje mu kanwa kawe?

17 Ko wanka inyigisho zanje

ugatera ibitugu amajambo yanje.

18 Ubonye umusuma wifatanya na we;

ugasangira umugabane wawe n’abasambanyi.

19 Akanwa kawe ugakoresha mu kuvuga ibibi

kandi ururimi rwawe ruvuga ivy’ubugunge.

20 Wicara uvuga nabi umuvukanyi wawe

ukararaza mwene nyoko bwite.

21 Igihe wabikora nanje narihoreye,

nawe wibaza ngo turangana.

Ariko nzoguhana,

ibirego vyanje vyose ndabishire imbere yawe.

22 Mumenye ibi, yemwe abibagira Imana,

kugira ngo sindabatabagure, mutagira gitabara.

23 Abanshikanira ibimazi vy’ishimwe baba bampesheje icubahiro,

kandi abagendera mu bugororotsi nzobereka agakiza kanje."