1 यहोवा मेरी जोति ए जो माखे बचाओई।

आऊँ केसी ते नि डरदा।

यहोवा मेरी रखवाल़ी आपू करोआ ओर आऊँ कदी बी चिन्ता नि करदा।

2 जेबे बुराई करने वाल़े मां पाँदे अमला करने खे मेरे नेड़े आओए,

तेबे सेयो ठोकर खाई की थाले रूड़ी जाओए।

3 चाए सेना बी मेरे खलाफ माखे केरा पाई लओ,

तेबे बी मां नि डरना; चाए मेरे खलाफ युद्ध छिड़ी जाओ,

तेबे बी मेरा परोसा यहोवे पाँदे अटल ए।

4 मैं सिर्फ एक ई बरदान प्रभुए ते मांगी राखेया,

मां तेतेरे ई जत्नो रे लगेया रा रणा,

ताकि आऊँ पूरी जिन्दगी प्रभुए रे मईलो रे रई सकूँ ओर प्रभुए री सुन्दरता खे देखी सकूँ

ओर तेसरे मईलो रे दर्शण करुँ।*27:4 पजन 6:8, पजन 23:6, फिलि. 3:13

5 प्रभुए मुसीबता रे बखते आऊँ आपणे

मण्डपो रे लकोई देणा;

तेस माखे आपणे तम्बूए रे पीतरे आसरा देणा

ओर तेस आँऊ सुरक्षित जगा दे राखणा।

6 एबे मेरा सिर मेरे चऊँ कनारलेया दुश्मणा ते ऊच्चा ऊणा

ओर मां प्रभुए रे तम्बूए रे जयजयकारा साथे बलिदान चढ़ाणा

ओर तेसरा पजन गाणा।

7 ओ प्रभु, जेबे आँऊ ताखे आका पाऊँ तेबे मेरी पुकार सुणी लओ,

तूँ मां पाँदे दया कर ओर माखे उत्तर दे।*27:7 पजन 130:2-4, पजन 13:3

8 जेबे तैं बोलेया, "आओ मेरी आराधना कर।"

तेबे मैं ज्वाब दित्तेया, "मां आऊणा, प्रभु।"

9 आऊँ तेरा दास ए; मांते नराज नि ऊणा ओर ना मांते दूर ऊणा।

तैं हमेशा मेरी मताद करी राखी ए।

तूँ मेरा सेई परमेशर ए जिने आऊँ बचाई राखेया,

इजी री खातर एबु माखे नि छाड।

10 मेरे माये-बाओए तो आऊँ छाडीता रा,

पर प्रभुए आऊँ सम्बाल़ी लणा।

11 माखे सखा, ओ प्रभु, कि तूँ क्या चाएआ कि आऊँ करुँ,

ओर माखे एक सुरक्षित बाटा दे लई चल, कऊँकि मेरे बऊत दुश्मण ए।*27:11 पजन 5:8

12 माखे मेरे सताणे वाल़ेया री इच्छा पाँदे नि छाड,

कऊँकि चूठे गवा, जो मेरे खलाफ खड़ी रे;

सेयो चगड़ा करने रिया धुना रे ए।

13 पर आऊँ जाणूंआ कऊँकि आऊँ तां पाँदे परोसा करूँआ, जदुओ तक आऊँ जिऊँदा ए तूँ माखे पला ए।*27:13 पजन 142:5

14 प्रभुए खे न्याल़दा रओ;

ईम्मत राख ओर तेरा दिल मजबूत रओ;

जरूर, प्रभुए खे न्याल़दा रओ।*27:14 पजन 31:24