Salmos 3

मुसीबता रे बखते आत्म-परोसा

दाऊदो रा पजन। जेबे से आपणे पाऊ अबशालोमो गे ते नठेया था।

1 ओ प्रभु, मेरे सताणे वाल़े कितणे बढ़ीगे रे!

मेरे बरोदो रे बऊत जणे उठी गे रे।

2 सेयो मेरे बारे बोलोए

कि तेसखे परमेशर पनि बचाई सकदा। सेला

3 पर ओ प्रभु! तूँ माखे हमेशा खतरे ते बचाणे रिया तँईं मेरे चऊँ कनारे महिमा जेड़ा ए।

तूँ माखे जिताएया ओर मेरिया ईमती खे बढ़ाएया।

4 आऊँ तां प्रभुए खे जोरे की आका पाऊँआ

ओर तूँ आपणे पवित्र पाह्ड़ो मतलब सियोनों ते माखे उत्तर देओआ। सेला

5 आऊँ लेटीगा ओर निश्चे साथे सुती गा,

आँऊ फेर ठीक-ठाक जागी की उठी गा, कऊँकि तूँ माखे सारी रात सम्बाल़ने वाल़ा प्रभु ए,

6 आऊँ तिना दस ह्जार दुश्मणा ते नि डरदा,

जो माखे काणे रिया तँईं चऊँ कनारे ते केरी की खड़ी रे।

7 उठ, ओ यहोवा! माखे बचाई लओ,

मेरे परमेशर! तूँ मेरे सबी दुश्मणा खे सजा देओआ

ओर तिना खे नुकशाण पऊँचाणे रिया तँईं कमजोर बणाई देओआ।

8 उद्धार प्रभुए तेई ओआ।

ओ प्रभु! तेरी आशीष तेरी प्रजा रे लोका पाँदे ओ।