1 प्रभुए रिया तँईं एक नया गीत गाओ,

ओ सारी तरतिया रे लोको प्रभुए रिया तँईं गाओ!*

2 प्रभुए रिया तँईं गाओ, तेसरे नाओं खे तन्य बोलो;

हर दिन तेसरे कित्ते रे उद्धारो रा शुभ समाचार सुणांदे रओ।

3 दूजिया जातिया दे यहोवे री महिमा रा

ओर देशो-देशो रे लोका गे तेसरे अचम्बे रे कामा रा बखाण करो।

4 प्रभु महान् ए ओर बऊत ई स्तुति करने लाईक ए;

से तो सबी देवतेया ते जादा आदर करने जोगा ए।

5 कऊँकि देशो-देशो रे सब देवता तो मूर्तिया ईए;

पर प्रभुए ई स्वर्ग बणाई राखेया।

6 तेसरे चऊँ कनारे मान-सम्मान ओर एश्वर्य ए;

तेसरे मन्दरो रे सामर्थ ओर शोभा ए।

7 ओ देशो-देशो रे कुलो रे लोको,

प्रभुए रा गुणगाण करो,

प्रभुए री महिमा ओर स्तुति करो!

8 प्रभुए रे नाओं री एड़ी महिमा करो जो तेस जोगी ए;

पेंट लई की तेसरे मन्दरो रे आओ!

9 परमेशरो री आराधना करो; जो सुन्दर ओर पवित्र ए।

ओ सारी तरतिया रे लोको तेस सामणे थरथरांदे रओ!

10 जातिया-जातिया बीचे बोलो, "प्रभु राज करोआ!

ओर तरतिया री निऊँ एड़ी मजबूत ए कि से ईल्ली नि सकदी;

प्रभुए देशो-देशो रे लोका रा न्याय बिना पक्षपातो साथे करना।

11 सर्ग खुशी मनाओ ओर तरती मगन ओ;

समुद्र ओर तिजी बीचलिया सारिया चीजा खुशिया साथे गरजो;

12 तरती ओर जो कुछ तिदे ए, से खुश ओ;

जेबे प्रभु आऊणा, तेबे बणो रे सारे डाल़ा प्रभुए रे सामणे जयजयकार करनी।

तेस तरतिया रा न्याय करने खे आऊणा।

13 यहोवे तार्मिकता साथे दुनिया रा

ओर सच्चाईया साथे सबी जातिया रा न्याय करना।"*