1 प्रभुए रा तन्यवाद करो, तेसते प्रार्थना करो,

देशो-देशो रे लोका बीचे तेसरे सारेया कामा रा प्रचार करो!

2 प्रभुए रिया तँईं गीत गाओ, तेसरा पजन गाओ,

तेसरे सारे अचम्बे रे कामा रे बारे दे सबी खे बताओ।

3 तुसे तेसरे पवित्र नाओं री तारीफ करो,

यहोवे खे टोल़ने वाल़ेया रा दिल खुश ओ!

4 यहोवे ते मतादा रिया तँईं बोलो;

हमेशा तेसरी जयजयकार करदे रओ।

5 तेसरे अचम्बे रे कामा खे, जो तिने कित्ते, याद करो,

तेसरे चमत्कार ओर कित्ते रे फैंसले याद करो!

6 ओ प्रभुए रे दास अब्राहमो रे वंशजो,

ओ याकूबो रे बच्चेयो, तुसे तो तेसरे चूणे रे ए!

7 सेई म्हारा प्रभु परमेशर ए;

सारिया तरतिया पाँदे तेसरे फैंसले ओए।

8 से आपणी वाचा खे, तेस वचनो खे

जो तिने ह्जार पीढ़िया खे देई राखेया, सदा याद राखोआ।

9 अब्राहमो साथे बानी री वाचा खे

ओर इसहाको साथे खाई री आपणी कसमा खे प्रभु याद राखोआ।*

10 ओर सेई तिने याकूबो खे बिधि-बिदान

ओर इस्राएलो रिया तँईं सदा री वाचा ठराई,

11 तिने ये बोलेया, "मां कनान देश ताखे ई देणा;

से बांडणे दे सदा खे तेरा ओर तेरे वंशो रा रणा।"

12 तेस बखते परमेशरो रे लोक गिणतिया रे थोड़े थे,

सेयो कनानो दे परदेशिया जेड़े रओ थे।

13 सेयो एकी देशो ते दूजे देशो दे

ओर एकी राज्य ते दूजे राज्य रे पटकदे रये।

14 पर यहोवे केसी बी माणूंए खे तिना पाँदे अन्देर नि करने दित्तेया

ओर से राजेया खे तिना रिया खातर ये तमकी देओ था,

15 तिने बोलेया "मेरे अभिषिक्ता खे नि छूणा

ओर ना ई मेरे नबिया रा अनिष्ट करना!"

16 तेबे यहोवे कनान देशो रे अकाल़ पेजेया

ओर नज्जो रे सारे पण्डार खाली करीते।

17 तेबे तिने यूसुफ नाओं रा एक मर्द तिना ते पईले पेजेया था,

जो दास ऊणे खे बेचेया था।

18 लोके तेसरे पैरा रे बेड़िया पाई की तेसखे दु:ख दित्तेया,

से लोए रे साँगल़ो साथे बानेया;

19 जदुए तक की तेसरी गल्ल पूरी नि ऊई,

तदुए तक प्रभुए रा वचन तेसखे कसौटिया पाँदे गूड़दा रया।

20 तिजी ते बाद मिस्रो रे राजे सिपाई पेजी की से छुड़ाईता

ओर प्रजा पाँदे राज करने वाल़े से इना बन्दना ते छुड़ाया;

21 मिस्रो रे राजे यूसुफ आपणे मईलो रा मालक

ओर आपणियां सारिया जायदाता रा अधिकारी ठराया,*

22 ताकि से आपणी इच्छा रे मुताबिक तेसरे परदाना खे उक्म देओ

ओर तेसरे बुजुर्गा खे ज्ञान सिखाओ।

23 तेबे इस्राएल मिस्र देशो रे आया

ओर याकूब हामो रे प्रदेशो रे परदेशी रया।

24 यहोवे आपणे लोक गिणतिया रे बऊत जादा बढ़ाए

ओर तेसरे दुश्मणा ते जादा सेयो तागतबर बणाए।

25 तेबे प्रभुए मिस्र देशो रे रणे वाल़ेया रा मन एड़ा फेरी ता

कि सेयो तेसरे निज लोका साथे बैर राखणे लगे

ओर तेसरे दासा साथे छल-कपट करने लगे।

26 तेबे यहोवे मूसा ओर हारूण पेजे जो यहोवे चूणी राखे थे।

27 तिने दुँईं जणेया मिस्री लोका बीचे प्रभुए रे चिह्न दखाए

ओर हामो रे देशो दे चमत्कार दखाए।

28 यहोवे तेस देशो दे अन्दकूप न्हेरा कित्तेया,

पर तेबे बी मिस्रो रे लोक यहोवे रिया गल्ला नि माने।

29 परमेशरे मिस्रिया रा पाणी खूनो रे बदली ता

ओर तिना रिया मछलिया काई तिया।

30 मिनके तिना री जमीना दे,

बल्कि तिना रे राजे रे मईलो रे बी परी गे।

31 परमेशरे आज्ञा दित्ती, तेबे माखा रे चूण्ड आईगे

ओर तिना रे सारे देशो रे पऊँरी रे चूण्ड आईगे।

32 प्रभुए तिना खे बर्खा रे बदले आणी रे गोल़े

ओर तिना रे देशो रे धधकती आग बरसाई।

33 प्रभुए तिना रिया अंगूरा रिया बेला

ओर दाऊगल़े रे डाल़ नाश करीते,

बल्कि तिना रे देशो रे सारे डाल़ तोड़ी ते।

34 प्रभुए आज्ञा दित्ती तेबे अणगिणत टिड्डिया

ओर कीड़े आईगे,

35 ओर तिने तिना रे देशो रा सारा नज्ज खाईता

ओर तिना री जमीना रे सारे फल़ चट करीते।

36 परमेशरे तिना रे देशो रे सब जेठे बच्चे,

तिना री तागती रे पईले फल़ नाश करीते।

37 तेबे यहोवे सूईने-चाँदिए साथे इस्राएली गुलामिया ते बारे निकयाल़े

ओर तिना बीचे कोई बी कमजोर नि था।

38 तिना रे जाणे ते मिस्रो रे रणे वाल़े खुश ऊईगे,

कऊँकि इस्राएलिया रा डर तिना रे पीतरे बसी गा था।

39 प्रभुए तिना खे छांयी रिया तँईं बादल़ फैलाया

ओर राती खे प्रयासा देणे खे आग प्रगट कित्ती।

40 इस्राएलिए खाणे खे मांगेया ओर परमेशरे बटेरा पऊँचाईया;

प्रभुए सेयो स्वर्गिय रोटिया साथे तृप्त कित्ते।*

41 यहोवे चट्टान तोड़ी की पाणी निकयाल़ेया

ओर सूकिया जमीना दे नदी बह्यीणे लगी।

42 परमेशरे आपणे दास अब्राहमो रिया तँईं

आपणे पवित्र वचन याद राखे।

43 प्रभु आपणे निज लोका खे खुशिया साथे

ओर आपणे चूणे रेया खे जयजयकारो साथे निकयाल़ी की लई आया।

44 ओर परमेशरे इस्राएलिया खे दूजी जातिया रे देश दित्ते

ओर सेयो ओरी लोका री मईणता रे फल़ो रे अक्कदार बणाईते,

45 तिने एड़ा इजी खे कित्तेया ताकि सेयो तेसरे नियमा रे मुताबिक आपणा जीवन जियो,

तेसरिया सबी आज्ञा खे आपणे मनो दे याद राखो। यहोवे री सदा जयजयकार ऊँदी रओ।