भजनसंग्रह 110

दावीदको भजन।

1 याहवेहले मेरा प्रभुलाई भन्‍नुहुन्छ:

"जबसम्म म तिम्रा शत्रुहरूलाई

तिम्रा खुट्टाको पाउदान बनाउँदिनँ,

तबसम्म तिमी मेरो दाहिने हातपट्टि बस।"

2 याहवेहले सियोनबाट यसो भन्दै आफ्नो महान् पराक्रमको राजदण्ड विस्तार गर्नुहुनेछ,

"आफ्ना शत्रुहरूका बीच तपाईंले राज्य गर्नुहुनेछ!"

3 तपाईंका युद्धको दिनमा

तपाईंका प्रजा राजीखुशीले तयार हुनेछन्।

पवित्रताको वैभवमा सुशोभित भई,

तपाईंका जवानहरू

बिहानीको गर्भबाट*110:3 मूल भाषामा यस खण्डको अर्थ अनिश्‍चित छ निस्केको शीतझैँ तपाईंकहाँ आउनेछन्।

4 याहवेहले शपथ खानुभएको छ,

र उहाँले आफ्नो करार भङ्ग गर्नुहुनेछैन:

"तिमी सदासर्वदाको निम्ति,

मल्कीसेदेकको दर्जाबमोजिम पुजारी हौ।"

5 प्रभु तिम्रो दाहिने हाततर्फ हुनुहुन्छ;

उहाँले आफ्नो क्रोधको दिनमा राजाहरूलाई चकनाचुर पार्नुहुनेछ।

6 उहाँले लासको थुप्रो लगाएर राष्ट्रहरूको न्याय गर्नुहुनेछ;

अनि पृथ्वीका सबै शासकहरूलाई चकनाचुर पार्नुहुनेछ।

7 उहाँले बाटो छेउको खोलाबाट*110:7 मूल भाषामा यस खण्डको अर्थ अनिश्‍चित छ पानी पिउनुहुनेछ;

यसरी उहाँले आफ्नो शिर उच्‍च पार्नुहुनेछ।