भजनसंग्रह 87

एउटा गीत, कोरहका छोराहरूका भजन।

1 याहवेहले आफ्नो जग पवित्र पर्वतमा स्थापित गर्नुभएको छ।

2 याकोबका सबै वासस्थानहरूलाई भन्दा उहाँले

सियोनका ढोकाहरूलाई बढी प्रेम गर्नुहुन्छ।

3 हे परमेश्‍वरको सहर,

तेरो विषयमा प्रशंसामय कुराहरू भनिएका छन्: सेला

4 "मलाई स्वीकार गर्नेहरूमध्ये

राहाब*87:4 इजिप्टको कवितात्मक नाम हो र बेबिलोनलाई म सूचीमा राख्नेछु—

पलिश्ती, टायर र कूशलाई*87:4 अर्थात्, नील नदीको माथिल्‍लो क्षेत्रको भू-भाग समेत

भन्‍नेछु, ‘योचाहिँ सियोनमा जन्मेको थियो।’ "

5 वास्तवमा सियोनको विषयमा चाहिँ यो भनिनेछ,

"यो र त्यो त्यहीँ जन्मेका थिए,

अनि सर्वोच्‍च परमेश्‍वरले नै त्यसलाई स्थापना गर्नुहुनेछ।"

6 याहवेहले जाति-जातिहरूका नाम दर्ता-पुस्तकमा लेख्नुहुनेछ:

"यसको जन्म सियोनमा भएको हो।" सेला

7 सङ्गीत बजाउँदा तिनीहरूले गाउनेछन्:

"मेरा सबै आशिष्‌का मूलहरू तँमा नै छन्।"