भजनसंग्रह 76

सङ्गीत निर्देशकको निम्ति, तारवाद्यमा आधारित, आसापको भजन; एक गीत।

1 यहूदामा परमेश्‍वर प्रसिद्ध हुनुभएको छ;

इस्राएलमा उहाँको नाम महान् छ।

2 उहाँको पाल शालेममा*76:2 शालेम यरूशलेम सहरको छोटो नाम हो, (उत्प 14:18) छ,

उहाँको वासस्थान सियोनमा छ।

3 त्यहाँ उहाँले अग्निकाँडहरू भाँच्नुभयो,

ढाल, तरवार र युद्धका हतियारहरू भाँच्नुभयो। सेला

4 तपाईं ज्योतिले चम्किलो हुनुहुन्छ,

र शिकारले भरिएका पर्वतहरूभन्दा पनि भव्य हुनुहुन्छ।

5 साहसी मानिसहरू लुटिएका छन्;

तिनीहरू गहिरो निद्रामा परेका छन्;

एउटै पनि शूरवीरले

आफ्नो हात उचाल्न सक्दैन।

6 हे याकोबका परमेश्‍वर, तपाईंको हप्काइमा

घोडा र रथ दुवै चीर निद्रामा परेका छन्।

7 तपाईं मात्र भययोग्य हुनुहुन्छ;

तपाईं रिसाउनुहुँदा तपाईंको अगि को खडा रहन सक्छ र?

8 स्वर्गबाट तपाईंले न्याय घोषणा गर्नुभयो;

र पृथ्वी डरायो र चुपचाप भयो—

9 हे परमेश्‍वर, जब तपाईं पृथ्वीमा पीडितहरू

सबैलाई बचाउन न्याय गर्न उठ्नुभयो। सेला

10 निश्‍चय नै मानव-जाति विरुद्ध तपाईंको क्रोधले तपाईंलाई प्रशंसा ल्याउँदछ;

र तपाईंको क्रोधबाट बाँचेकाहरू रोकिएका छन्।

11 तिमीहरूका परमेश्‍वर, याहवेहलाई भाकल गर, र त्यो पूरा गर;

उहाँलाई, जो भययोग्य हुनुहुन्छ, देशको चारैपट्टि रहने मानिसहरू

सबैले भेटी ल्याऊन्।

12 उहाँले शासकहरूको घमण्डलाई तोडिदिनुहुन्छ;

पृथ्वीका राजाहरू उहाँसँग डराउँछन्।