Salmos 19

1 आकाशले परमेश्‍वरको महिमाको वर्णन गर्दछ;

अन्तरिक्ष मण्डलले उहाँका हातका कामहरू प्रकट गर्दछन्।

2 हरेक दिनले अर्को दिनसँग परमेश्‍वरको महिमाको चर्चा गर्दछ;

हरेक रातले अर्को रातलाई उहाँका ज्ञानको प्रदर्शन गर्दछ।

3 तिनीहरू बोल्दैनन्, न त तिनीहरूको बोल्ने शब्दहरू नै छन्;

तिनीहरूबाट कुनै सोर सुनिँदैन।

4 तरै पनि तिनीहरूका सोर*19:4 मूल भाषामा नाप्‍ने रेखा सारा पृथ्वीभरि पुग्दछ;

तिनीहरूका आवाज संसारको अन्त्यसम्म पुगेका छन्।

परमेश्‍वरले आकाशमा सूर्यको निम्ति एउटा वासस्थान बनाउनुभएको छ।

5 जुनचाहिँ विवाह-मण्डपबाट निस्केको दुलहाझैँ छ,

दौडमा दौडिने धावकको विजयमा झैँ रमाउँछ।

6 त्यो आकाशको एक कुनाबाट उदाउँछ,

र अर्को कुनासम्म चक्‍कर लगाउँछ;

त्यसको तापबाट कुनै कुरो लुकिरहन सक्दैन।

7 याहवेहका व्यवस्थाहरू सिद्ध छन्,

प्राणलाई ताजा गराउने,

याहवेहका कानुनहरू विश्‍वासयोग्य छन्;

सोझा व्यक्तिलाई बुद्धिमान् तुल्याउने।

8 याहवेहका नियमहरू ठिक छन्,

हृदयलाई आनन्दित गराउने,

याहवेहका आज्ञाहरू उज्ज्वल छन्,

आँखालाई ज्योति दिने।