1 Pupurihin ko ang Panginoon!

Buong buhay kong pupurihin

ang kanyang kabanalan.

2 Pupurihin ko ang Panginoon,

at hindi kalilimutan

ang kanyang kabutihan.

3 Pinatatawad niya

ang lahat kong kasalanan,

at pinagagaling

ang lahat kong karamdaman.

4 Inililigtas niya ako

sa kapahamakan,

at pinagpapala ng kanyang pag-ibig at habag.

5 Pinagkakalooban niya ako

ng mga mabubuting bagay

habang akoʼy nabubuhay.

Kaya akoʼy parang nasa

aking kabataan

at malakas tulad ng agila.

6 Ang Panginoon ay matuwid

sa paghatol;

binibigyang-katarungan ang lahat ng inaapi.

7 Ipinahayag niya kay Moises

ang kanyang pamamaraan,

at inihayag sa mamamayan ng Israel

ang kanyang mga gawang

makapangyarihan.

8 Ang Panginoon ay mahabagin

at matulungin,

hindi madaling magalit

at sagana sa pagmamahal.

9 Hindi siya palaging nanunumbat,

at hindi nananatiling galít.

10 Hindi niya tayo pinarurusahan

ayon sa ating mga kasalanan.

Hindi niya tayo ginagantihan

batay sa ating pagkukulang.

11 Dahil kung gaano man kalaki

ang agwat ng langit sa lupa,

ganoon din kalaki ang pag-ibig ng Diyos

sa mga may takot sa kanya.

12 Kung gaano kalayo

ang silangan sa kanluran,

ganoon din niya inilalayo sa atin

ang ating mga kasalanan.

13 Kung paanong ang ama ay nahahabag

sa kanyang mga anak;

ganoon din ang pagkahabag ng Panginoon

sa mga may takot sa kanya.

14 Sapagkat alam niya ang ating kahinaan,

alam niyang tayoʼy mula

sa alabok lamang.

15 Ang buhay ng tao

ay tulad ng damo.

Tulad ng bulaklak sa parang,

itoʼy lumalago.

16 At kapag umiihip ang hangin,

itoʼy nawawala at hindi na nakikita.

17 Ngunit ang pag-ibig ng Panginoon

ay walang hanggan

sa sinumang may takot sa kanya;

ang matuwid niyang gawa

ay wala ring katapusan.

18 Ang magkakamit nitoʼy ang tapat

sa kasunduan,

at tapat na sumusunod

sa kanyang kautusan.

19 Itinatag ng Panginoon

ang kanyang trono

sa kalangitan,

at siyaʼy naghahari sa lahat.

20 Purihin ninyo ang Panginoon,

kayong mga anghel niya,

na nakikinig at sumusunod

sa kanyang mga salita.

21 Purihin ninyo ang Panginoon,

kayong lahat na mga nilalang niya

sa langit, na naglilingkod sa kanya

at sumusunod

sa kanyang kalooban.

22 Purihin ninyo ang Panginoon,

kayong lahat na mga nilalang niya

sa lahat ng dako

na kanyang pinaghaharian.

Purihin ang Panginoon!